बाढ व पखानसे सावधान हुइ

तीन दिनसे लग्टारे बरसल परल पानीके कारण तराईके टमान क्षेत्र डुबानमे परल बा, कलेसे पहाडमे पखान गिरके धनजनके क्षति हुइल बा । लग्टारे बरसल पानीसे कैलाली जिल्लामे आइल बाढसे करिब ६ हजारसे ढिउर घर डुबानमे परल बा । कलेसे ३ जाने बाढमे पुहके वेपत्ता हुइल बाटै । जिल्ला प्रशासन कार्यालय कैलालीके तथ्यांक अनुसार भजनी नगरपालिकामे १ हजार ८४० घर, जोशीपुर गाउँपालिकामे २ हजार ३१५ घर, जानकी गाउँपालिकामे १ हजार, टीकापुर नगरपालिकामे करिब १ हजार करके ६ हजार १५० से ढिउर घर डुबानमे परल बा ।

भजनी नगरपालिकाके प्रभावितहुकन लग्गेक विद्यालय, उच ठाउँ हुलाकी राजमार्गमे सारगिल बा । मने हुलाकी राजमार्गमे ३ फिट उप्पर पानी बह्रल बा । विस्थापित हुइल बाढ प्रभावितहुकनके लाग खानेपानी, खानाके समस्या बिल्गाइल बा । उहाँहुक्रे हुलाकी राजमार्ग सहित उच ठाउँमे त्रिपाल टाँङके बैठ्ना बाध्य हुइल बटै । कैलाली जिल्लामे खासकैके मोहना, कन्द्रा, काँढा, पथरैया, कर्णाली लडियामे आइल बाढसे डुबान हुइल बा । कैलाली ग्रामीण क्षेत्रमे आइल बाढके कारण खाद्यन्न पुरा भिजल बा, कलेसे ढेर जानेक घरेक चुल्हामे आगीफे सुल्गे नइसेकल हो ।

कालीकोटके नरहरिनाथ गाउँपालिकामे पहिरोसे भँठके ८ जानेक ज्यान गैल बा कलेसे एकजाने बेपत्ता हुइल बाटै । ओस्टेक दाङके बंगलाचुली गाउँपालिकामे पहिरोसे घर भँठके दुई जानेक ज्यान गैल बा । सुदूरपश्चिम प्रदेशके पहाडी जिल्लाक ठाउँ–ठाउँमे पहिरो गैल बा ।

जल तथा मौसम विज्ञान विभागके अनुसार देशभर मनसुनी वायुके प्रभाव रहलओरसे सुदूरपश्चिमके अधिकाशं क्षेत्रमे पानी पर्ना सम्भावना रहल बा । यहाँके लडियामे जौन बेलामे फेन पानीके बहाब बह्रे सेक्ना, पहाडी क्षेत्रमे भूक्ष्य हुइना, पहिरो जैना, सडक तथा हवाई यातायात प्रभावित हुइना तथा ढल ओ पानीके मजा निकास नैहुइल ठाउँमे डुबान समेत हुइ सेक्ना हुुइलओरसे उच्च सातर्कता अप्नाइक लाग उ विभाग आग्रह कर्ले बा ।

बाढ घटलेसे टमान रोगके संक्रमणफे डेखाई सेकठ, अन्नापात सक्कु भिजल कारण भोकमरी निम्टे सेकठ, पानी अभिन नइरुकल कारण बाढ पहिरोसे ठप जोखिम निम्टे सेकठ, टबमारे सक्कु पक्षके ध्यान जैना जरुरी बा ।