लडिया उपटके बस्ती डुबानमे
पहुरा समाचारदाता
धनगढी, १८ सावन । शनिच्चरके रात बरसल पानीसे कटैनी लडियामे यी बरसके सबसे भारी बाढ आइल बा ।
कटैनी लडिया उपटलपाछे कैलारी गाउँपालिका वडा नम्बर ५ के लौवा गाउँ बैजपुरमे पानी पैठे लागल स्थानीय प्रविन बौखही जनैलै । उ लडियामे आइल बाढ सतहपार करके बैजपुर बजारमे पानी पैठल बा । बाढ अभिन बह्रटी रहल ओरसे बस्तीमे समेट पैठे सेक्ना उहाँ बटैलै ।
ओस्टेक कटैनी लडियक उप्पर क्षेत्र गौरीगंगा नगरपालिका–८स्थितलिक्मामे अँटवारके सकारे ४ बजेओर लिक्मा मुक्तकमैया शिविरके करिब सक्कु घरेम पानी पैठल पत्रकार घनश्याम पौडल बटैलै ।
उहाँ कहलै, बरसौढी पानीक बहाब एकचोट्टे बह्रके लिक्मा शिबिरके मुक्तकमैयाहुकनके घरेम पैठके फे एकफाले घटल, उ बाढ टरेक क्षेत्रओर असर पारे सेक्ना पत्रकार पौडेल बटैलै । उहे लडियक पानी गौरीगंगाके दर्जनौ घरमे बाढ पेलल बा । अँटवारके सकारे गौरीगंगा नगरपालिका वडा नम्बर १० अध्यक्ष पदमबहादुर ऐर डुबान क्षेत्रमे स्थलगत अनुगमन करले रहिट । उहाँ क्षति हुईल घरेक अवस्था हेरके राहत वितरण कैना बटैलै ।
ओस्टेक करके कैलारी गाउँपालिका वडा नम्बर ८ स्थित उदासीपुरके भङहा गाउँमे १० घर डुवानमे परल पत्रकार दिनेश दहित बटैलै । अब्बे पानीके बहवा घटटी रहल उहाँ जनैलै ।
