सेतीमे बेपत्ता हुइल स्वास्थ्यकर्मीके शव फेला
पहुरा समाचारदाता
धनगढी, १९ सावन । सेती लडियामे लहैना क्रममे शनिच्चरके बेपत्ता हुइल डडेल्धुरा अस्पतालमे कार्यरत दुनु स्वास्थ्यकर्मीके शव फेला परल बा ।
बेपत्तामध्ये बझाङ स्थायी घर रहल हेल्थ असिस्टेन्ट (एचए) विनय सिंहके फेन सोम्मारके शव फेला परल बा । ओहकान शव बेपत्ता हुइल स्थानसे करिब १ किलोमिटर टरे भेटल हो ।
शिखर नगरपालिकाके बान्डुंग्रीसैनके सेती किनारमे स्थानीय शव फेला पारल डोटीके प्रहरी उपरीक्षक जनकराज पाण्डे बटैलै ।
यिहीसे आघे अँट्वारके डडेल्धुराके परशुराम नगरपालिका घर रहल ल्याब असिस्टेन्ट हरिश जोशीके शव डोटीके केआईसिँह गाउँपालिकाके नारीदाङमे फेला परल रहे । ओहकान शव घटनास्थलसे बहुट दुर फेला परल जिल्ला प्रहरी कार्यालय डोटीके प्रहरी नायव उपरीक्षक इन्द्रबहादुर मल्ल बटैलै ।
शनिच्चरके डडेल्धुरा अस्पतालमा कार्यरत चारुजाने सकारे डोटीस्थित शैलश्वरी मन्दिर दर्शनके लाग गैल रहिट । मन्दिर दर्शन कैके घुमेबर लहैना क्रममे उहाँहुक्रन मध्ये तीनजहनहे पुहाइल रहे । उ मध्ये खगेन्द्र कुँवरहे स्थानीय उद्धार कैके बचाइल रहिट । कलेसे हरिश जोशी ओ बझाङ स्थायी घर रहल हेल्थ असिस्टेन्ट (एचए) विनय सिंह बेपत्ता हुइल रहिट ।
