फेर तीन दिन मनसुन सक्रिय हुइना
काठमाडौं, २४ सावन । नेपालमे फेर अइना तीन दिन मनसुन सक्रिय हुइना हुइल बा । आज रातसे मनसुन न्यूनचापीय रेखा नेपालके तराई भूभाग लग्गे सरना सम्भावना विल्गाइल ओरसे दुई÷तीन दिनसम देशके ढेर जैसिन स्थानमे हल्कासे मध्यम वर्षा हुइना मौसमविद् शान्ति कँडेलके कहाई बा ।
‘कुछ स्थानमे भारी वर्षाके सम्भावनासमेत रहल बा’, मौसमविद् कँडेलके कहाई बा । मौसमविद्के अनुसार यी वर्ष मनसुन ढेर सक्रिय हुइल बा । यी वर्ष निरन्तर वर्षा हुइटी रहल बा । मनसुनी रेखा नेपालमे ढेर दिनसम रहटी रहल ओरसे वर्षा ढेर हुइल बताइल बा ।
आज रातसे दुई÷तीन दिनसम नेपालमे मनसुन सक्रिय हुके देशके ढेर स्थानमे हल्कासे मध्यम वर्षाके साथे कुछ स्थानमे भारी वर्षाके सम्भावना रहल ओरसे मौसम पूर्वानुमान महाशाखासे सतर्कता अपनैना अनुरोध करले बा ।
हाल प्रदेश नं २ मे ओ प्रदेश नं ५ के कुछ भूभागमे आंशिक बदरी तथा बाँकी भूभागमे सामान्यसे पूर्ण बदरी रहल बा । ओस्टेक वाग्मती प्रदेश, गण्डकी प्रदेश, प्रदेश नं ५, कणाली प्रदेश ओ सुदूरपश्चिम प्रदेशके कुछ स्थानमे वर्षा हुइटी रहल बा ।
दुपहर देशभर सामान्य बदरी रहिके देशके कुछ स्थानमे मेघगर्जन÷चट्याङसहित हल्कासे मध्यम वर्षाके साथे प्रदेश नं १, वाग्मती प्रदेश, गण्डकी प्रदेश ओ सुदूरपश्चिम प्रदेशके एक वा दुई स्थानमे भारी वर्षाके सम्भावना रहल मौसम पूर्वानुमान महाशाखा जनैले बा । साभार रातोपाटी
