लग्टारे परल पानीसे धनगढी जलमग्न (फोटु फिचरसहित)

पहुरा समाचारदाता
धनगढी, २६ सावन । शनिच्चरके रोजसे लगटार बरसल सवनीय झरीसे आज धनगढी जलमग्न हुइल बा ।

बरसौढी पानी जमके धनगढी उपमहानगरपालिका वडा नम्बर १,२,३,४,५ ओ ८ के २ सय ५० घरधुरी डुबानमे परल जिल्ला प्रहरी कार्यालय कैलालीके सह–प्रवक्ता प्रहरी निरीक्षक हिक्मत थापा जनैलै ।

धनगढी बजारस्थित मेनरोड एलएन चोकमे मजा ढल निकास नइहुके प्रदेशभा कार्यालय लगायत आसपासके पसलसमेट पानी पैठल बा । बाढसे सबे ढेर प्रभावित वडा नम्बर १ के शिवनगर, बसन्तटोल, वडा नम्बर ८ धनगढी गाउँ हुइल बा । ओस्टेक धनगढी उपमहानगरपालिका वडा नम्बर ८ के कार्यालय डुबान हुके कामकाज समेट ठप्प हुइल वडा अध्यक्ष नारायण बराल जनैलै । वडा कार्यालय लग्गे रहल राधाकृष्ण मुक्तकमैया बस्ती पुरा डुबानमे परल बा ।

बस्ती ओ घरेम पानी पैठलपाछे सक्कु मुक्तकमैयाहुकन थ्रिस्टर बोडिङ स्कुलमे सारल अध्यक्ष बराल बटैलै । उहाँ कहलै, अब्बे वडा कार्यालयके अङगनामे छातीसम पानी बा, आउर पानी अइलेसे कार्यालयमे पानी पेसे सेकी, पानी जमके कामकाज पूर्णरुपमे ठप्प हुइल बा ।’ मुक्तकमैयाहुकन सुरक्षित ठाउँमे सारके सुटना खैना व्यवस्था समेट करल अध्यक्ष बराल बटैलै ।