थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १७ अगहन २६४६, शनिच्चर ]
[ वि.सं १७ मंसिर २०७९, शनिबार ]
[ 03 Dec 2022, Saturday ]

पानी बहना खोल्ह्वामे घर ओ अन्धाधुन्ध विकाससे धनगढी डुबानमे

पहुरा | २६ श्रावण २०७७, सोमबार
पानी बहना खोल्ह्वामे घर ओ अन्धाधुन्ध विकाससे धनगढी डुबानमे

पहुरा समाचारदाता
धनगढी, २६ सावन ।
सुदूरपश्चिम प्रदेशके अस्थायी राजधानी समेत रहल धनगढी उपमहानगरपालिका जलमग्न हइना कौनो लौव बात नैहो । यी टे बर्खामे किल नाई, जार छेक, गर्मी छेकके समयमे फेन एक्के घरी पर्ना पानीसे पानी पानी होके डुब जाइठ धनगढी ।
खोल्ह्वा अतिक्रमण, पानी निकासके उचित व्यवस्थापन नैहोको धनगढी बजार डुबानमे परटी आइल हो ।

रातभर परल पानीसे सोम्मारके रोज धनगढी उपमहानगरपालिकाके अधिकांश क्षेत्र जलमग्न हुइल बा । धनगढीके सबसे ज्यादा एलएनचोक, पार्कचोक तथा प्रदेश सभा आसपास, विशालनगर, मिलनचोक, चौराहा, उत्तरबेहरी, धनगढी गाउँ, शिवनगरलगायतके क्षेत्र डुबानमे परल हो ।

पानी पहना कुलुवा, खोल्ह्वामे घर बने लागलपाछे डुबानके समस्या आइल धनगढी उपमहानगरपालिका ७ के शारदा राना बटैलै । धनगढीके कैलाली नाला, सुकुटी नालासे ज्यादा अतिक्रमणमे परके साँकिर हुइना सगे भठगिल बा । जौनकारण कम पानी पर्लेसे फेन डुबानमे परटी आइल हो ।

ओस्टके अन्धाधुन्ध हुइटी रहल विकासके गतिविधिसे फेन धनगढी डुबानमे परल बा । विना निकासके व्यवस्थापन हुइले बन्टी रहल सडकसे फेन धनगढी डुबानमे परटी आइल हो ।
धनगढीमा निर्माणधिन अवस्थामा रहल छ लेन सडक, रिङरोड निर्माण संगे उचित पानीके निकास नैहुइलओरसे डुबानके समस्या आइल धनगढी उपमहानगरपालिका ७ के मोहन कोराल बटैठै ।

सघन सहरी विकास आयोजना अन्तरगत सडक निर्माण हुइटी रहल बेला उचित ढल निकासके व्यवस्थापन नैकरलपाछे समस्या बिकराल बन्टी गैल कोरालके कहाइ बा ।

जिल्ला प्रहरी कार्यालय कैलालीके प्रहरी निरिक्षक हिक्मत थापाके अनुसार धनगढी उपमहानगरपालिकाके वडा नं. १, २, ३, ४, ५, ८ लगायत क्षेत्र डुबानमे परल बा । जेहिसे करिब २५० घरमे पानी पेलल बा । मने ओइसिन क्षति भर नैहुइल प्रहरी निरिक्षक थापा बटैलै ।

ओस्टेक २४ घण्टाके अवधिमे धनगढी क्षेत्रमे ५४.३ मिलिमिटर पानी परल महाकाली बेसिन फिल्ड कार्यालय अत्तरियाके मौसम विज्ञान सहायक सिंगल चौधरी जानकारी डेलै ।

सम्बन्धित समाचार

लग्टारे परल पानीसे धनगढी जलमग्न (फोटु फिचरसहित)

जनाअवजको टिप्पणीहरू