बाढसे हुलाकी सडक भसक्के आवागमनमे समस्या

पहुरा समाचारदाता
धनगढी, २६ सावन । १४ सावनमे आइल बाढसे हुलाकी सडक भसक्के आवागमनमे समस्या हुइल बा । भजनी नगरपालिकाके ठेकीपुरसे सोनाहाफाटासम ४/५ ठाउँमे बाढसे सडक नै पुहाडेहलपाछे आवागमन ठप्प हुइल हो ।

भजनीके स्थानीय पदम साउद हुलाकी सडक होके टीकापुर पुग्न आधाघण्टा किल लग्नामे अब्बे जोशीपुर होके टीकापुर जैना एकघण्टा लग्ना बटैलै । कतिपय स्थानीय भर जोखिम मोलके हुइलेसे फेन हुलाकी सडक प्रयोग कैके आवातजावत करटी रहल बटैटी साउद कौनो फेन बेला दुर्घटनामे परे सेक्ना सम्बन्धित निकायके ध्यानाकर्षण करैले बाटै ।

हुलाकी राजमार्ग आयोजना कार्यालय धनगढीके साइट इन्जिनियर मोहनचन्द्र हमाल वर्षा हुइटी रहल कारण सडक मर्मतमे समस्या हुइल बटैलै । ओहकान अनुसार ठेकीपुरसे सोनाहाफाटा समके करिब ७ किलोमीटर एरियाके ४/५ ठाउँमे बाढसे सडक नै पहुाइल बटैटी निर्माण कार्य शुरू करे लागल बा । डाइभर्सन कैके सडक बनाइ पर्ना हुइल ओरसे वर्षाके कारण अवरोध हुइल हमालके कहाइ बा । यिहे बिच, धनगढीके क्याम्पस रोडसे टीकापुरके सत्तिसमके ६२ किलोमिटर हुलाकी सडक डबल लेनके हुइना हुइल बा ।

क्याम्पस रोडसे मनेहरासमकके साढे ३ किलोमिटर सडक भर चार लेनके हुइना बा । चार प्याकेजमे टेन्डरमार्फत बनाइ लागल हुलाकी सडकके क्याम्पस रोडसे ठेकीपुरसमके तीन खण्डके स्वच्छन्द जोशी निर्माण सेवा ओ ठेकीपुरसे सत्तिसमके निर्माणके काम कालिका जोशी पाइल इन्जिनियर हमाल जानकारी डेलै ।