नेपाली काँग्रेससे अनुगमन प्रतिवेदन सार्वजनिक
पहुरा समाचारदाता
सुखड, ३० सावन । नेपाली काँग्रेस घोडाघोडी नगर कार्य समितिसे अनुगमन प्रतिवेदन सार्वजनिक करले बा ।
घोडाघोडी नगरपालिकामे संचालित आर्थिक वर्ष २०७६/२०७७ मे हुइल योजनाके बारेम पत्रकार सम्मेलन मार्फत अनुगमन प्रतिवेदन सार्वजनिक करल हो । १२ वडामे गठित अनुगमन समितिसे करल स्थलगत अनुगमन पाछे प्रतिवेदन सार्वजनिक करल हो । सार्वजनिक करल प्रतिवेदनमे विकासके योजना व्यक्तिगत पहुँच तथा राजनैतिक पहँचके आधारमे वितरण करल, संचालित आयोजना मध्ये ढिउर जैसिन विधि ओ प्रक्रिया विपरित संचालन हुइल, नागरिक वडापत्र सक्कुु योजनामे नाइ टासल ओरसे बजेट हिनामिना करल जनगुनासो रहल उल्लेख करल बा ।
ओस्टके उपभोक्ता समिति गठन करेबर आपन लग्गेक व्यक्ति समितिमे राखल ओ वास्तविक उपभोक्ताहे समावेश नाइ कैके गुपचुप गठन करल साथे वडासे फेन व्यवस्था कैके सिफारिस करल अरोप लगाइल बा । यकर साथे प्रदेश तथा संघीय सरकार एवं सांसद विकास कोषके रकम आपन अनुकुल व्यक्ति ओ स्थानमे वितरण कैके कमिसन लेना करल, कुछ योजनाके पारदर्शिता, गुणस्तर मापदण्ड तथा दिगोपन नाइ रहल, योजनामे समयमे सम्पन्न करे नाइ सेकके रकम फ्रिज हुइल, सामाजिक विकासके योजना खर्च नाइ कैके फ्रिज गैल पाइल जनाइल बा ।
ओस्टके आर्थिक बरस २०७६/०७७ मे कुछ योजना किल मापदण्ड ओ प्रक्रिया पुगल सार्वजनिक करल अनुगमन प्रतिवेदनमे कहल बा । पत्रकार सम्मेलनमे नगरपालिकासे बनाइल क्वारेन्टिनके मजा व्यवस्थापन नाइ रहल नगरपालिकासे सार्वजनिक करल खर्च विवरण अनुसार सेवा सुबिधा नाइ पाइल, सक्कु क्वारेन्टिनमे खैना, बैठ्ना, खानेपानी तथा शौचालयके व्यवस्था नाइ करल पाइल बा ।
पीसिआर टेष्टके रिपोर्ट पोजेटिभ डेखलहे आईसोलेसनमे नाइ राखके घर पठाईल ओरसे समाजमे त्रासपुर्ण वातावरण सृजना हुइल प्रतिवेदनमे उल्लेख करल बा । नगरभिटटर संचालित विकास निर्माण तथा आर्थिक कार्यके पारदर्शितामे जोड डेके विकास योजनाहे दिगो ओ प्रभावकारी बनैना, सत्तापक्षके कमीकमजोरी तथा आर्थिक अनियमिताके बारेम जनताहे सुसुसचित करैना ओ सत्तापक्षहे सचेत करैना नेपाली काँग्रेस घोडाघोडी नगर कार्य समिति जनैले बा ।
