थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १९ अगहन २६४६, सोम्मार ]
[ वि.सं १९ मंसिर २०७९, सोमबार ]
[ 05 Dec 2022, Monday ]

तलब निकासा नैहुइल कटी शिक्षा इकाईमे तालाबन्दी

पहुरा | २३ भाद्र २०७७, मंगलवार
तलब निकासा नैहुइल कटी शिक्षा इकाईमे तालाबन्दी

पहुरा समाचारदाता
धनगढी, २३ भदौ ।
शिक्षा विकास तथा समन्वय इकाई कञ्चनपुरमे तालाबन्दी करगिल बा । शून्य दरवन्दी रहल सामुदायिक विद्यालयमे डेटी आइल शिक्षण सिकाई अनुदान कोटामे कार्यरत कञ्चनपुरके शिक्षकहुक्रे मंगरके रोज शिक्षा इकाई कञ्चनपुर ओ इकाई प्रमुखके कार्यकक्षमे तालाबन्दी करल हुइट ।

देशभरीके सामुदायिक विद्यालयमे नेपाल सरकारसे डेटी आइल उ कोटाके लाग शैक्षिकसत्रके आघेक् असारमे एकमुष्ट रकम निकासा हुइटी आइल रहे । मने यी बरस दुई महिना बिट्लेसे फेन रकम निकासाके कौनो आधिकारिक जानकारीसम नैआइलओरसे तालाबन्दी करल संघर्ष समितिके संयोजक बलविरसिँह भण्डारी बटैलै ।

एक विद्यालमे कार्यरत शिक्षक तलब पैना मने अप्नेहुकनके तलबके कौनो टुंगो नैलागलओरसे टमान माग राखके आन्दोलन कर्ना बाध्य हुइल उहाँ बटैलै । यहिसे आघे अप्नेहुक्रे शिक्षा ईकाईमार्फत शिक्षा मन्त्रीलाईहे उ विषयमे ज्ञापन पठाइल मने कौनो जवाफ नैआइलओरसे अप्नेहुक्रे तालाबन्दी कर्ना बाध्य हुइल समेत उहाँ बटैलै ।

सामुदायिक विद्यालयके शिक्षण सुधारके लाग मुख्य विषय अंग्रेजी, गणित ओ विज्ञान शिक्षकके अभाव परिपुर्तिके लाग नेपाल सरकार शिक्षक अभाव रहल तथा शुन्य दरवन्दी रहल विद्यालयहे २०७५ सालसे एकमुष्ट रकम प्रदान करटी आइल रहे । यी बरस कोरोनाके कारण डेखैटी गैल असार महिनामे निकासा हुइक पर्र्ना रकम निकासा करल नैहो ।

निजी क्षेत्रहे कर्मचारीहुकनके रोजगारी नैखतम कर्ना निर्देशन डेटी आइल सरकार अप्नही शिक्षकहुकनके तलब निकासा कर्ले नाई हो । निकासा सम्बन्धी कौनो जानकारी फेन डेहल नैहो । अप्नेहुक्रे नियम संगत रूपमे नियुक्त हुइलमे कौनो फेन हालतमे रोजगारसे बञ्चित नैकराइक पर्ना मागप्रति सरकार कौनो प्रतिक्रिया नैडेखाइल कहटी आन्दोलनमे गैल भण्डारी बटैलै ।

जनाअवजको टिप्पणीहरू