आफन्तसे सत्यतथ्य छानविनके माग

पहुरा समाचारदाता
धनगढी, २७ भदौ । जिल्ला प्रहरी कार्यालय कैलालीके हिरासतमे रहल एकजानेक रहस्यमय मृत्यु हुइल बा । जिल्ला प्रहरी कार्यालयके थुनुवा कक्षमे चोरीके अभियोगमे पक्राउ परल १९ वर्षीय रोशन बिकके रहस्यमय तरिकासे मृत्यु हुइल बा ।

थुनुवा कक्षमे रहल मृतक विकके मुरी, आँखी,नाक, निधारमे चोट लागल विल्गाइल बा । यिहे विच घटनाके सत्यतथ्य छानबिन हुई पर्ना माग करटी मृतकके आफन्त जिल्ला प्रहरी कार्यालय, कैलाली घेराउ करके घटनाके सत्यतथ्य छानविनके माग करले बाटै ।

मृतक रोशनके बाबा टेकबहादुर विक अपन छावाके आत्महत्या नइहुके कुटपिट करके हत्या करल आरोप लगैले बाटै । मृतकके डाई मनु विक छावाहे मारल कहटी सत्यतथ्य छानबिन हुई पर्ना माग करले बाटी ।

मने जिल्ला प्रहरी कार्यालय कैलालीके प्रहरी नायब उपरिक्षक प्रतिक विष्टसे मृतक विकसे थुनुवा कक्षके शौचालयमे आत्महत्या करल बटैलै । विक भदौ २२ गते चोरीके अभियोगमे धनगढी उपमहानगरपालिका वडा नम्बर– १ से पक्राउ परल रहिट । प्रहरी नायव उपरीक्षक विष्ट घटना सम्बन्धी अनुसन्धान हुइटी रहल बटैले बाटै ।