भाडा छुट करुइया घरधनीहे करमे छुट

पहुरा समाचारदाता
धनगढी, ३० भदौ । धनगढी उपमहानगरपालिकासे लकडाउनके समयमे घर भाडा छुट करुइया घरधनीहे घरबहाल करमे छुट डेना निर्णय करले बा ।

मनकारी घरधनीहे राहत पुगे कहिके उपमहानगरपालिकासे यैसिन निर्णय करल नगरप्रमुख नृपबहादुर वड बटैलै । सरकारसे २०७६ चैत ११ गतेसे जेठ मसान्तसम्म कोरोना भाईरस कोभिड– १९ के संक्रमण फैले नइडेना लकडाउन करल रहे । लकडाउनके समयमे घरभाडामे बैठलहुक्रे कतिपय भाडा छुट करल रहिट । धनगढी उपमहानगरपालिकासेफे अपन कम्प्लेक्स भाडामे लेहलहुकनसंग ५० प्रतिशत भाडा छुट करलफे नगरप्रमुख वड बटैलै ।

धनगढी उप–महानगरपालिका राजश्व शाखा प्रमुख लेखनाथ ओझा सक्कुहे एक्के मापदण्ड हुइना करके लकडाउनमे घरभाडा छुट डेना घरधनीहे दुई महिनाके घरबहाल करमे छुट डेना बटैलै । यकर लाग घर भाडामे छुट डेहल प्रमाण हुई पर्ना बा राजश्व शाखा प्रमुख ओझा कहलै, यिहीहे उपमहानगरपालिकासे क्रसचेक कैना । झुठा ठहरलेसे कार्वाही कैना बा ।