इलाका प्रशासन सुखडसे स्थानीय तहगत सेवा प्रवाह कैना

पहुरा समाचारदाता
सुखड, ३१ भदौ । कैलालीके घोडाघोडी नगरपालिमे रहल इलाका प्रशासन कार्यालय सुखडसे स्थानीय तहगत सेवाप्रवाह कैना जनैले बा । बुधके एक सुचना जारी करटी प्रशासनसे आपन मातहतके स्थानीय पालिकाके सेवाप्रवाहहे समय तालिका अनुसार विभाजन करले बा ।

कार्यालयसे सेवाग्राहीके चापके कारण कोभिड–१९ के जोखिम बह्रटी गैल कहटी स्थानीय तहगत रुपमे सेवा प्रवाह कैना सार्वजनिक सूचना जारी करले बा । औरे व्यवस्था नाइ हुइटसमके लाग कार्यालयसे स्थानीय पालिकाके सेवाप्रवाहमे समय तालिका अनुसार विभाजन करल कार्यालय प्रमुख घन प्रकाश जोशीसे हस्ताक्षरित जारी सूचनामे उल्लेख रहल बा ।

कार्यालयसे जारी करल सूचनामे घोडाघोडी नगरपालिकाके सेवाग्राहीके लाग अँट्वार ओ बुध, गौरीगंगा नगरपालिकाके सेवाग्राहीके लाग सोम्मार ओ बिफेके समय निर्धारण करल बा । ओस्टके बर्दगोरिया गाउँपालिकाके लाग मंगर ओ शुकके समय निर्धारण करल बा कलेसे मोहन्याल गाउँपालिके लाग हरेक दिन मिति तय करल सूचनामे उल्लेख रहल बा ।

कार्यालयसे सेवा लेहे अउइया सेवाग्राही अनिवार्य रुपमे सामाजिक दुरी कायम करटी मास्क ओ स्यानिटाइजर जैसिन सुुरक्षाके मापदण्ड प्रयोग करे पर्र्ना उल्लेख रहल बा ।