मूल भन्सारके पीडा, अक्के भवनमे सब काम

पहुरा समाचारदाता
भजनी, ३१ भदौ । कैलालीके टीकापुर नगरपालिका–९ मे रहल सत्ती भन्सार कार्यालय मूल भन्सारके रूपमे स्तरोन्नति हुइल दुई बरस हुइलेसे फेन आवश्यक संरचना निर्माणके काम आघे बह्रे सेकल नाइहो ।

सत्ती छोटी भन्सार निर्माण हुइल संरचनासे कामकाज हुइटी रहलेसे फेन कार्यालयके लाग चाहना आवश्यक संरचना निर्माण हुइ नाइ सेकके सेवा प्रवाहके काममे समेत समस्या हुइटी आइल बा ।

गत आर्थिक बरसमे यात्रु सहायता कक्ष, भन्सार कार्यालयमे घेरा पर्खाललगायत संरचना निर्माणके लाग करिब रु तीन करोड बजेट आइल रलेसे फेन कौनो काम नाइ कैके पूरै रकम फ्रिज गैल कार्यालयके सूचना अधिकारी धर्मराज विक बटैलै ।

‘विभागसे बजेट आइल रहे । कोरोनाके कारण कौनो प्रक्रिया आघे बह्रे सेकल नाइहो,’ सूचना अधिकारी विक कहलै, ‘बजेट फ्रिज गैगिल, काम करे नाइ सेकगैल । भन्सारके समस्या जसके टस बा ।’

भन्सार कार्यालयसंग एकठो किल भवन रहल बा । उहे भवनमे कर्मचारीके आवास, कार्यालय, गोदाम बा कलेसे एक कोठा बैंकहे फेन डेहल बा । संरचना अभावके कारण खाद्यान्न, तरकारी, फलफूल तथा पशु जाँचके गुणस्तर परीक्षण केन्द्रसमेत सञ्चानलन हुइ सेकल नाइहो ।

व्यवसायीहुक्रे ओइसीन सामानके आयातके लाग भारत नेपालके छोट दूरी सत्ती भन्सार जाके फेन आभिन कैलालीके त्रिनगर भन्सार वा नेपालगञ्जके रुपैडिया नाकाहे नै प्रयोग करे पर्र्ना बाध्यता रहल बटैलै । स्थानीय तरकारी व्यवसायी समीर चौधरी लग्गे भन्सार कार्यालय रलेसे फेन ओकर सदुपयोग करे नाइ सेकल बटैलै ।

‘लग्गे भन्सार कार्यालय बा मने, हम्रे त्रिनगर कि टे रुपैडिया भन्सार जाइ परठ्,’ चौधरी कहलै, ‘सत्ती भन्सार कार्यालयमे सक्कु सुविधा रहट कलेसे ढिउर खर्चके भार नाइ परट ओ उपभोक्ता फेन ढिउर मूल्य टिरे पर्ना नाइ रहे ।’

भन्सारमे सरुवा होके अउइया कार्यालय प्रमुख कार्यालयसे फेन ढिउर बिदामे बैठ्ना हुइल ओरसे आइल बजेट खर्च हुइ नाइ सेकल स्थानीयवासीके गुनासो रहटी आइल बा ।

चालू आर्थिक बरसमे फेन भन्सार कार्यालयमे संरचना थपके लाग करिब रु दुई करोड आइल सूचना अधिकारी धर्मराज विक बटैलै ।

भन्सारसे लाखौँ पर्ना बरामद हुइल मोटरसाइकलके लिलामसमेत करे सेकल नाइहो । झन्डे १०० से ढिउर मोटरसाइकल भन्सार परिसरमे ठन्कल बावै । ठन्कल मोटरसाइकल दिनप्रतिदिन कवाड बन्टी गैल रलेसे फेन गैल बरससे भन्सार उ सवारी साधनके लिलामी प्रक्रिया आघे बह्राइ सेकल नाइहो ।

बरामद कैके लालन मोटरसाइकलके बाहिरी पाटपुर्जासमेत गायव हुइल बावै । भन्सार पुगाइल हप्ता दिनमे मोटरसाइकलके महत्वपूर्ण पाटपुर्जा भन्सार कर्मचारीके मिलेमतोमे गायव हुइना करल स्थानीयवासीके कहाइ बा । ढिउर जैसिन चोरी–पैठारीमे प्रयोग हुइल दुई नम्बरी मोटरसाइकल भन्सार पुग्ना करल बावै ।