थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ३० सावन २६४६, सोम्मार ]
[ वि.सं ३० श्रावण २०७९, सोमबार ]
[ 15 Aug 2022, Monday ]
‘ कबिता ’

सरकार टु काहाँ बाटो ?

पहुरा | १० आश्विन २०७७, शनिबार
सरकार टु काहाँ बाटो ?

हम्र यहाँ भुख पियासल बाटी
हमारठे खैना गाँस निहो,
लगैना कपास निहो,
गाउँघर सहर बजारके कोन्वा कोन्वाम
जिना सासट होस्याकल
सरकार टु काहाँ बाटो ?

जब जब चुनााब आइट त
टु हर गाउँक समस्या बुझ्ठो,
हर सहरके कोन्वा कोन्वाम जाखन हमार पीडा बुझ्ठो,
कञ्चन पानीसे फटिक घोषण पत्र जारी कर्ठो ,
असिन कर्बि ओसिन कर्बि, देश बनैबी , विकास कर्बि कठो,
कुइ गरिब कुइ दुःखी हुइ निपरी कठो,
एक गासक लाग अन्त ढाइ निपरी कठो,
हमहन सुन्दर सपना देखैठो,
देशह स्वीजट्रल्याण्ड बनैबी कठो,
असिन टुहार बात, आश्वासन मै फगत देख्ठु ।
मिठ भाषणकेल कर्ठो,
यहर करो ओहर करो जनतनकेल मर्ठो,
सरकार टु काहाँ बाटो ?

जब टु सरकारम जिठो ट कहाँ हेरैठो ?
टु त छन्छिन्डिक कोट पाइन्ट फेर्ठो,
कुर्सीम बैठ पैलसे आफन बात फेर्ठो,
सुरा सुन्दरीसँग ऐयासी जीवनके रात फेर्ठो,
देशक ढुकुटीम पैसक खात फेर्ठो ।
जनतनके दुःख पीर व्यथा फ्यार निसेक्ठो,
आपत विपतम फेन जनतन ह्याार निसेक्ठो,
कत्रा प्रकृतिक विपत्तिम बट ,
का लगाउ कहाँ बैठु कैख छट्पटाइल बाट ।
खै त राज्यक उपस्थििति ?
खै त सरकारके उपस्थिति ?
ओह कैख सरकार टु काहाँ बाटो ?

हमारठे त ओह फाटल पुरान चड्रीकेल बा,
उध्रल पैरक गोन्द्री केल बा,
वरस दिनम एकठो ढावा फेर्ना लुग्रा फे निहो,
मजासे छाइल बुक्रा फे निहो,
रोग, भोक ओ शोकले ग्रसित बाटी ।
सरकार टु काहाँ बाटो ?

पोहर साल म्वार डाइ उपचार नापाख लालमुरै खैली,
बन्टरान काकक हालफे ओस्टह बाटिन् ,
कैयो दिदी बाबु हुक्र बलत्कारके सिकार हुइटी बाट ,
कर्मशील युवा हुक्र खाली खाली बाट,
चारुओर ठग, दलाल भष्ट्रचारी केल बाट,
सक्कुओरसे ठग्वा पैटी बाटी,
शसन, प्रशासन हर निकायमसे सट्वा पैटी बाटी,
कफ्र्युक ब्यालमफे कत्रा घर जरल,
दिदी बाबु बलात्कार हुइबेर कत्रा मन जरल,
टुहारठे शासन बा,
टुहारठे प्रशासन बा,
टुहारठे सब ताला चाबी बा,
टुहार हाठम देश दुवार बा,
ओह त पुछ्नास मन लागट,
सरकार टु काहाँ बाटो ?

देशम प्रजातन्त्र, गणतन्त्र अन्ली कठो,
संविधान फे बनैली कठो,
खै त न्याय ? काहाँ हेरागिल ?
खै त कानुन ? काहाँ बा ?
खै त बलत्कृत बैसाहान बाबु न्याय पैली ,
खै त निर्मला बाबु न्याय पैली ?
असिन प्रश्न टमान बा ? सरकार !
दोषिन कारबाही कर्लक कब्बु निसुन्ठु ।
अपराधिन पक्रल खबर कब्बु निसुन्ठु ।
ओह त पुछ्नास मन लागट ,
सरकार टु काहाँ बाटो ?

जय गुर्बाबा !

जनाअवजको टिप्पणीहरू