पोषणयूक्त खाना दैनिक जीवनसे जोरना जरुरी बाः गापा उपाध्यक्ष भगवती

पहुरा समाचारदाता
धनगढी, २ जेठ । कैलाली जिल्लाके कैलारी गाउँपालिकामे पोषण प्रदर्शनी मेला २०८३ कार्यक्रम सम्पन्न हुइल बा । पोषणबारे जानकारी करैटी कुषोषण न्यूनिकरणके लाग पोषण प्रदर्शनी मेलाके आयोजना कैगिल हो ।

कैलारी गाउँपालिकाके आयोजनामे केयर नेपाल, केयर नेपाल ओ आइडिई के आर्थिक सहयोग तथा याक नेपालके समन्वय सहकार्यमे पोषणख मेलाके आयोजना हुइल बा ।

गाउँपालिका उपाध्यक्ष भगवतीकुमारी चौधरीके प्रमुख आतिथ्यतामे हुइल कार्यक्रममे उहाँ पोषणयूक्त खानाहे दैनिक जीवनसे जोरे सेक्लेसे केल्ह कृपोषण हटाई सेक्ना बटैली । उहाँ कहली, पोषण यूक्त खाना सक्कु जाने खाई पर्ना जरुरी बा । एक लरकोरया डाई मनै खैही कलेसे ओइनके बच्चा फे मजा रहिही, बच्चा खाना खाई मेरिक हुईही कलेसे ओइनफे खवैना जरुरी बा । ओ बृद्धा, सामान्य खैही कलेसे रोगसे लर्ना शक्ति प्रदान हुई ।

हमारे पोषणयूक्त खाना खाई नैजन्ठी गाउँपालिका उपाध्यक्ष कहली, कबु कबु साग केल्ह खैना, कबु कपुवा केल्ह खैना, कबु कबु शिकारही होजैना करठ मने उहीहे हम्रहिन सन्तुलित पोषण नैमिले सेकी, पोषणयूक्त खाना ओ टिनाटावन मिलाके खैबी कलेसे बच्चा कृपोषित नैरहिकी । ओ बृद्धा या भारी मनै रोगी नैरहिकी ।

कार्यक्रममे वडा नम्बर ४ के वडा अध्यक्ष ठागुराम चौधरी ओ वडा नम्बर ६ के वडा अध्यक्ष प्रेम बहादुर चौधरी लर्कनहे स्वास्थ्य तथा कृपोषणसे बचाइक लाग पोषण चार्ट अनुसार खाना कैना सुझाव डेहल रहिट । पोषणयूक्त खानासे टमान रोगफे ठिक हुइना ओरसे आपन खेतबारीमे अपन उत्पादन करल मलके प्रयोग कैना उत्पादन कैना आग्रह करलै ।

कैलारी गाउँपालिकाके स्वास्थ्य शाखा प्रमुख नरेशकुमार चौधरी यी पालिकामे टमान लर्कनहे कुपोषण डेखल बटैलै । गाउँपालिका अन्र्तगत सक्कु वडामे रहल नौ ठो स्वास्थ्य संस्थामे ६ महिनासे ५ बरस टरेक बालबालिकाके पोषण लेखाजोखा (स्क्रेनिङ) अभियानमे गाउँपालिकामे २६ जाने बालबालिकाहुकनमे कडा खालके सिघ्र कुपोषण डेखा परल रहे ।

नौ ठो स्वास्थ्य संस्थामे ६ महिनासे पाँच बरस भिटरके कुल २ हजार १ सय ७३ जाने बालबालिकाके पोषण लेखाजोखा (स्क्रेनिङ) कैगिलमे १ हजार ९ सय ५६ जाने सामान्य, १ सय ९१ माध्यम सिघ्र कुपोषण ओ २६ जनहनमे कडा खालके सिघ्र कुपोषण डेखा परल उहाँ बटैलै । उहाँ कैलारी गाउँपालिकाके वडा नम्बर ३, ४, ५ ओ ८ नम्बरमे पोषणमैत्री वडा ओ कुछ वडामे बालमैत्री वडा घोषणाके तयारीमे रहल बटैलै ।

पोषणयूक्त खाना नैखैना जंङकफुड खाना खैना प्रवृति बह्रल बा, जिहीहे नैसरना रोग बह्रल बा कलेसे क्यान्सरफे बह्रल उहाँ बटैलै । विषादीयूक्त खानाके प्रयोग बह्रल कारण स्वास्थ्यमे झन समस्या बह्रल उहाँ बटैलै ।

कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरीके अध्यक्षतामे हुइल कार्यक्रममे उहाँ विषादीके प्रयोग करके टिना टावन उत्पादन कैना कहल सबसे सुरुमे आपन भान्सामे विषादी पुगैना हो कहलै ।

याक नेपालके लैङिक समानता सामाजिक समावेशीकरण अधिकृत सरिता चौधरी पोषण परियोजना मार्फत कैलारी गाउँपालिका वडा नम्बर ४ ओ ७ के २५ ठो आमा समुह पोषण सुधारके लाग पोषण बगैचा सुरुवाट करल बटैली ।

हजार दिनके लरकोरया डाई ओ बच्चाके पोषण सुधारके लाग पोषणके गतिविधि करजैटी बा, उहाँ कहली, ‘सीमान्तकृत समुदायके लाग विउ पुँजीके रुपमे १० हजार रुप्या सहितके किसान कार्ड उपलब्ध करागैल बा । जिहीहे उ समुहमे रहल लरकोरया डाई सागपात, हरियार टिना टावन उत्पादनके लाग विया किन्ना, पोषण बगैचा निर्माण कैना ओ टिना उत्पादन अन्र्तगत कृषि कार्यमे प्रयोग हुइना समान किन्ठै ।

याक नेपालसे आमा समु्हमे आवद्ध रहल ५ सय जनहनहे किसान कार्ड उपलब्ध करैले बा, जौन कार्डमे टिनाके विया, हजारी, पानी डरना पाइप, जाली, उत्पादन पोषण बगैचाके लाग सपोट करल उहाँ बटैली ।

पोषण बगैचामे टमान मेरिक हरियार साग, मौसमी तथा वेमौसमी टिना उत्पादन कैगिल बा । कलेसे महिलाहुकनके बच्चनके लाग झोल लिटो पकैना तरिकाफे सिखागैल बा । पोषण परियोजना लागु हुइलपाछे पोषणयूक्त खानाके साथे स्वास्थ्य संस्थामे समय समयमे चेकजाँच करैटी रहलपाछे माध्यम कुपोषणके केसहे सामान्य अवस्थामे ल्यन्ना मद्दत मिलल उहाँ बटैली ।

पोषण प्रदर्शनी मेलामे पोषणयूक्त खाना, पोषणयूक्त टिना टावनके प्रदर्शनीके संगे पोषण सम्बन्धी सचेतनामुलक थारु नाँचफे डेखागैल रहे । कार्यक्रमके संचालन मञ्जु चौधरी करल रही । कार्यक्रममे वडा अध्यक्षहुक्रे, कार्यपालिका सदस्य, वडा सदस्य, टमान शाखाके प्रमुख, स्वास्थ्यकर्मी, याक नेपालके प्रतिनिधि। टमान गाउँक भल्मन्सा, स्वास्थ्य आमा समुह, इलाका प्रहरी कार्यालयके प्रमुखलगागतसहभागिता रहे ।