महेन्द्र राजमार्गके २५/२५ मिटर दायाँ बायाँ खाली करैना
पहुरा समाचारदाता
धनगढी, ३० बैशाख । महेन्द्र राजमार्ग (चिसापानी–अत्तरीया–गड्डाचौकी) सडक क्षेत्रके अतिक्रमण हटैना १५ दिने अल्टिमेटम डेहल बा ।
नेपाल सरकार सडक विभाग सडक डिभिजन महेन्द्रनगर अन्तर्गत महेन्द्र राजमार्ग (चिसापानी–अत्तरीया–गड्डाचौकी सडक खण्डके सडक सीमा सडक केन्द्रसे २५/२५ मिटर दायाँ बायाँ कायम रहल ओरसे उहीहे अतिक्रमण करके बनाइल टहरा भौतिक पूर्वधार हटैना सूचना जारी करल बा ।
उ सडक सीमाभिटर सडक विभागके स्वीकृति बिना स्थायी÷अस्थायी घर टहरा निर्माण कैना, निर्माण सामग्री धरना, मालबस्तु बिक्री कैना धारल, नाली भाँठके प्रवेश मार्ग बनैना, सडक संरचना भत्कैना, ढल तथा पानी सडक किनाराके नालामे मिलैना कार्य, तथा अस्टे प्रकृतिके अन्य यातायात संचालन एवं सडक प्रयोगकर्ताहे अवरोध पुग्न कार्य कैना सार्वजनिक सडक ऐन, २०३१ से निषेध करल बा ।
उ सडक सीमा भिटर बनल स्थायी÷ अस्थायी घर टहरा तथा अन्य संरचना सूचना प्रकाशित हुइल मितिसे १५ दिन भिटर भत्कैना वा हटैना संघीय सडक सुपरिवेक्षण तथा अनुगमन कार्यालय, सुर्खेत सडक डिभिजन महेन्द्रनगर जानकारी करैले बा ।
तोकल समयावधि भिटर सडक सीमा अतिक्रमण करके बनाइल संरचना नैहटैलेसे सार्वजनिक सडक ऐन २०३१ के दफा १९ के उपदफा (३) बमोजिम यी कार्यालयसे हटैना ओ उ कार्य वाफत लग्ना खर्च सम्बन्धित व्यक्ति वा संस्थासे असुल उपर कैना जनागिल बा ।
