जन्म दिनमे विपन्न परिवारहे खाद्य तथा स्वास्थ्य सामग्री प्रदान
पहुरा समाचारदाता
धनगढी,११ कुवाँर । युगअस्त्र दैनिन धनगढीके प्रकाशक तथा वातावरण संरक्षणकर्मी वीरेन्द्र बहादुर रावल अपन जलम दिनके अवसरमे कैलालीके खुटिया खोला किनारमे गिट्टी फोरके गुजारा करटी आइल विपन्न परिवारहुकनहे खाद्य तथा स्वास्थ्य सामग्री प्रदान करले बाटै ।
जलमदिनके अवसर पारके मनै आजभोली फजुलके खर्च कैना ओ केक काटके संघरीयासंग रहरंगी कैना परम्पराहे अन्त्य कैना सोचके साथ जन्मदिनहे खुटिया खोलामे रहल विपन्न महिला, बालबालिका ओ बृद्धबृद्धाके माझ मनाइल बटैलै ।
तामझाम ओ तडकभडक करके जलम दिन मनाके लाखौं रुपैया खर्च कैना परम्पराके अन्त्य कैना ओ लोकतन्त्रमे विपन्न समुदाय भोगे परटी रहल समस्याप्रति सरकारके ध्यानाकर्षण कैना उद्देश्यके साथ मजदुरहुकनके ठेन जन्म दिवस मनाइल बाट पत्रकार रावल बटैलै ।
जन्मदिनके अवसरमे खुटिया खोलामे विना मास्क, स्वास्थ्य सामग्रीके प्रयोग नइकरके गिटट्ी फोरटी रहल महिला बालबालिका तथा बृद्धबृद्धाहुकनहे स्वास्थ्य चेतना बँरटी खोला किनारमे गिगट्ी फोरटी रहल ६० जनहनहे मास्क, साबृुन, भुजा, चाउँचाउ ओ लुगा धुइना सरफ लगायतके सामग्री वितरण करल पत्रकार रावल बटैलै ।
यी आघेक बर्षमेफे मुक्त कमैया, बादी बालबालिका, सुकुम्बासी क्षेत्रके अतिविपन्न ओ अपाङगता रहल परिवारहे फे राहत सामग्री प्रदान करल उहाँ बटैलै । पछिल्का समयमे विकृतिके रुपमे मनैटी आइल जन्म दिनहे मानव सेवामे सर्मपित करटी रचनात्मक बनाके लैजाई पर्ना सोचके साथ विपन्न वर्गके माझमे जन्मदिन मनाइल उहाँ जनैलै ।
