बन्दाबन्दीमे लैङिक हिंसाके घटनामे बृद्धि

पहुरा समाचारदाता
धनगढी, १२ कुवाँर । बन्दाबन्दीके अवधिमे लैङिक हिंसाके घटनामे बृद्धि हुइल एक कार्यक्रमके सहभागीहुक्रे बटैले बटै ।

जुरी नेपालके आयोजनामे लैङिक हिंसाके घटनामे न्याय पहुँचके अवस्था विषयक महिला अधिकारकर्मी, सामाजिक अगुवा तथा सरोकारवाला निकायसंग सोम्मार रोज हुइल भर्चुअल अन्तरक्रिया कार्यक्रममे सहभागीहुक्रे बन्दाबन्दीमे लैङिक हिंसाके घटना बह्रल बटैले रहिट ।

ओरेक नेपालके वरिष्ठ कार्यक्रम संयोजक संगिता तिमिल्सिना कोरोना भाइरसके कारण सरकारसे करल बन्दाबन्दीके अवधिमे महिला सबसे ढेर संक्रमणके जोखिम परल जनैली । घर परिवारके सक्कु सदस्य घर बैठना एक ओर कामके बोध दुसर ओर संक्रमणके डर हुइल अवस्था रहे ।

‘बन्दाबन्दीमे कोईफे बाहेर जैना अवस्था नइरहे,’ उहाँ कहली –‘हिंसा प्रभावित पीडित सरोकारवाला निकायमे जाई नइसेक्के ढेर घटना समेट डबगिल ।’ कैलालीमे बलात्कार, बोक्सी आरोप, छाउपडीके घटनामे बृद्धि हुइल बा, महामारीके बेला काममे महिलाहुकनहे विभेद हुइल संयोजक तिमिल्सिना जनैली ।

धनगढी उप–महानगरपालिका न्यायिक समितिके सदस्य रत्ना विष्ट बन्दाबन्दीके बेलाफे लैङिक हिंसाके मुद्दा दर्ता हुइल जनैली । चैत ११ से सुरु हुइल बन्दाबन्दीके और ओर बन्द रहे मने धनगढी उपमहानगरपालिका निरन्तर सेवा डेटी उ अवधिमे मोबाइलसे ६० ठो मुद्दा दर्ता करल उहाँ जनैली ।

अधिवक्ता शसी बस्नेत गर्भसे लैङिक हिंसाके सुरुवाट हुइल बटैली । छाई रहलेसे गर्भमे टुहाडेना, छावा रहलेसे जल्मैना करल उहाँ बटैली । बन्दाबन्दीके अवधि बलात्कारके घटनामे बृद्धि हुइल मने पीडित न्याय पैनासे बन्चित हुइल अधिवक्ता जनैली ।

सेती प्रादेशिक अस्पताल व्यवस्थापन समितिके सदस्य रोजी बस्नेत कोरोना महामारीके बेला गर्भवती महिलाहुक्रे सबसे ढेर समस्यामे परल बटैली । सेती प्रादेशिक अस्पतालमे कोरोनो विमारी बह्रल ओ नर्मल सेवा लेहुइया विमारीके संख्यामे कमी आइल जनैली ।

बन्दाबन्दीमे गोसिया लगायत सारा परिवार विना कामके घरे बैठल कारण यौनजन्य हिंसा बह्रल डेवका केसी बटैली । उहाँ कहली, बन्दाबन्दीके बेला अपन परिवारके सदस्यसे बलात्कार हुइल घटना संंचारमाध्यमसे सुन्गैल ।

लैङिक हिंसाके घटनामे न्याय पहुँचके अवस्था विषयक महिला अधिकारकर्मी, सामाजिक अगुवा तथा सरोकारवाला निकायसंग सोम्मार रोज हुइल भर्चुअल अन्तरक्रिया कार्यक्रममे सहजीकरण शान्ति बर्मा करले रही । कलेसे कार्यक्रम नेपाल राष्ट्रिय दलित समाज कल्याण संघके अध्यक्ष चक्र विकके अध्यक्षतामे हुइल रहे ।