भजनीमे एक वडा एक प्राविधिक
पहुरा समाचारदाता
भजनी, १३ कुुँवार । कैलालीके भजनी नगरपालिकासे एक वडा एक प्राविधिक रहना मेरके काममे खटाइल बा । वडास्तरसे हुइना विकास आयोजनाहे समयमे लागत अनुमान डेना ओ काम शुरु कैना समस्या हुइटी रहल ओरसे नगरपालिकाके नौ वडामे एकएक प्राविधिक खटाइल हो ।
कौनो फेन योजना बनेबर सम्बन्धित वडासे स्थलगत अनुगमन कैके लागत अनुमान बनाइ सेकजैना तथा योजना सम्पन्न हुइलेसे फेन वहाँके प्राविधिक स्थलगत अनुगमन कैना, कामके मूल्यांकन समयमे हुइना जैसिन योजनाके कामके लाग नगरपालिकासे प्राविधिकके टोली सक्कु काम कैना सम्भव नाइ हुइलपाछे वडामे प्राविधिक रहना व्यवस्था करल नगर उपप्रमुख छाया देवकोटा जानकारी डेली ।
‘वडामे प्राविधिक रख्लेसे उपभोक्ता समितिसे नाइ बुुझल सक्कु बातहे मजासे बुझके निर्माणके काम कैना सहज हुइनाके साथे योजना निर्माणमे प्राविधिकके निगरानी, परामर्श हुइना हुइल ओरसे कारण वडास्तरमे प्राविधिक राखल हुइटी,’ नगर उपप्रमुख देवकोटा कहली, ‘गुणस्तरीय काम ओ स्टिमेट निर्माण करेबर भौगोलिक अवस्था ओ विपतके अवस्था हेरके प्रत्यक्ष निगरानी करे सेकजाइ । समयमे उपभोक्ता समिति गठन, काम सम्पन्न हुइना बा ।’
यिहीसे आघे प्रत्येक वडाके योजनाके लागत अनुमान ओ अनुगमन नगरपालिकासे करेबर उपभोक्ता समितिहे समयमे योजनाके लागत अनुमान डेना ओ काम शुरु कैना समस्या हुइटी रहल नगरपालिकाके निमित्त प्रमुख प्रशासकीय अधिकृत हरिराम चौधरी बटैलै । ओहेमारे स्थानीयवासीके सुविधाके लाग वडामे प्राविधिक राख्न निर्णय करल प्रमुख चौधरी जानकारी डेलै ।
‘जनताके सेवा घरदैलोमे पुगैना उद्देश्यसे नगरपालिकासे हरेक वडामे कामके विभाजन कैके प्राविधिक खटाइल बा,’ चौधरी कहलै, ‘कौनो फेन योजना निर्माणाधीन चरणमे अनुगमन करगैलेसे समयमे सुधार कैके दीर्घकालीन ओ गुणस्तरीय बनाइ सेकजाइ । ओकर लाग हुइलेसे फेन वडामे प्राविधिक रहना व्यवस्था करल हो ।’
