उन्नत जातके धानबाली अनुगमन
पहुरा समाचारदाता
हसुलिया, १७ कुवाँर । कैलारी गाउँपालिका अन्र्तगतके किसानहुक्रनसे लगागैल उन्नत जानके धान, मिर्चा, टमाटर लगायत खेतीके जातीय प्रर्दशनीके गाउँपालिका स्तरी टोलीसे अनुगमन करगिल बा ।
कैलारी गाउँपालिका वडा नं. १ हसुलिया स्थित बनदेवी कृषि सहकारी संस्थासे सञ्चालित तथा ज्ञानमे आधारित एकीकृत दिगो कृषि परियोजना नेपाल (किसान–२ परियोजना)के सहयोगमे करगैल उ जातीय प्रर्दशनीके अनुगमन करगिल हो ।
उ टोलीसे कैलारी गाउँपालिका वडा नं. ३ लालपुरके हरियाली महिला कृषक समूहसे करगैल धान खेतीके जातीय प्रर्दशनी, वडा नं. ३ भर्रीके गुलाब कृषक समूहसे करल मिर्चाके जातीय प्रदर्शनी, वडा नं. २ बसौटीमे करल टमाटरके जातीय प्रदर्शनी ओ वडा नं. २ लक्कडमे करल धानके जातीय प्रर्दशनीके अनुगमन करल सहकारीके कार्यक्रम संयोजक कृष्ण चौधरी जानकारी डेलै ।
अनुगमन पाछे गाउँपापालिका अध्यक्ष लाजुराम चौधरी कृषकहुक्रनसे करगैल उन्नत जातके धान, मिर्चा लगायत टमाटर खेती मजा रहल बटैलै । ओकर साथे अध्यक्ष चौधरी उन्नत जातके धान, गहुँ लगायट टिनाटावन खेती करेबर प्राविधिकहुक्रनसे सल्लाह सुझाव लेहे पर्नाके साथे लगासेकल पाछे फेन प्राविधिकहुक्रनसे अनुगमन करैना आवश्यक रहल बटाइल रहिट ।
‘किसानहुक्रनसे करगैल उन्नत जानके धान, मिर्चा, टमाटर लगायत खेती बहुट मजा रहल बा’, अध्यक्ष चौधरी कहलै–‘यी मेरके खेतीके लाग कृषकहुक्रनहे प्राविधिकहुक्रनके सल्लाह सुझाव लेहे पर्नाके साथे जागरुक बनैना आवश्यक रहल बा ।’
अनुगमन टोलीमे गाउँपालिकामे उपाध्यक्ष लक्ष्मी सत्गौंवा, वडा नं. ३ वडा अध्यक्ष कैलाश चौधरी, कृषि शाखाके प्रास गोरखराज उपाध्याय, किसान–२ परियोजना कैलालीके क्षेत्रीय संयोजक राजेन्द्र चौधरी, एएमटी गोपाल चौधरी, सहकारीके अध्यक्ष इच्छा चौधरी, उपाध्यक्ष तीर्थप्रसाद नेपाल, सदस्य औंसियाराम चौधरी, सहकारीके स्टाफ तथा कृषक लगायनके सहभागिता रहल रहे ।
