थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०१ भादौ २६४६, बुध ]
[ वि.सं १ भाद्र २०७९, बुधबार ]
[ 17 Aug 2022, Wednesday ]

बाढसे डहल घाउमे मलहम लगैटी बा, कमैया प्रथा उन्मुलन समाज

पहुरा | १७ आश्विन २०७७, शनिबार
बाढसे डहल घाउमे मलहम लगैटी बा, कमैया प्रथा उन्मुलन समाज

पहुरा समाचारदाता
भजनी, १७ कुवाँर ।
कैलालीके भजनी नगरपालिका–३ के संजिव तामाड्ढ बाढसे सक्कु खैना चीज पुहाइलपाछे किहि बाबा कहु, किही डाई कहु अवस्थामे पहिल चो खाद्य सामग्रीसहितके राहतके सामान पाइलपाछे उप्पर सास लेहल रहिट ।

बाढसे सबसे प्रभावित क्षेत्रमे बासोबास करटी आइल उहाँ कमैया प्रथा उन्मुलन समाज कैलाली गैल शनिच्चरके रोज राहतके सामान पाइलपाछे राहतके महसुस करल हुइट ।

उहाँ आघे कहलै–‘घरेम रहल सक्कु धान चाउर मध्य कुछ पुह गैल, कुछ भिज गैल रहे । खेटुवा मनिक धान फेन डहागिल जम्मा । का कर्ना हो ? बहुट कर्रा अवस्था बावै । पहिल चो राहत मिलल टे डहल घाउमे मलहम लगाइल हस महसुस हुइल ।’

ओहे वडाके प्रतिक्षा बस्नेत फेन राहत पाइलपाछे कुछ दिनके लाग आपन जिविकोपार्जनमे सहजुल हुइना बटैली । टमान सरोकारवाला निकायहुक्रे राहत वितरण कर्लेसे फेन वास्ताविक बाढ पीडितहुक्रे नैपाइल दुखेसो पोख्टी वास्ताविक बाढ पीडितहुकन पहिचान करेक पर्ना बटैली ।

समाजसे टमान मेरिक राहतके सामान पाइलपाछे बाढ पीडित तमाड्ढ ओ बस्नेत किल नाई ४९ घरधुरी कुछ दिनके लाग राहत महसुस कर्ले बाटै । क्रिस्टियन एडके आर्थिक सहयोगमे समाजसे प्रतिपरिवार २५ केजी चाउर, ३ केजी दाल, २ लिटर खैना तेल, २ केजी चिनी, १ केजी नोन, १ सय ग्राम चिया पटट्ी, स्वच्छता सम्बन्धी सामग्रीसहित १९ मेरके राहत सामग्री वितरण करल समाजके कार्यक्रम संयोजक सुरज परियार जानकारी डैलै ।

समाज भजनीके बाढ पीडितहुकन किल नाई जिल्ल्लाके आउर स्थानीय तहस्थित बाढ पीडितहुकन राहत वितरण करटी आइल बा । कार्यक्रम संयोजक परियारके अनुसार समाज कैलारी गाउँपालिकाके २४१, जोशीपुर गाउँपालिकाके १९२ घरधुरीहे यहिसे आघे राहत वितरण करसेक्ले बा ।

भजनी नगरपालिका वडा नं. ३ के वडा अध्यक्ष विक्रम चौधरी प्राथमिकताके आधारमे सक्कु बाढ पीडितहुुकन राहत वितरण करटी आइल जानकारी डेलै । भजनीके सबसे ढिउर बाढ प्रभावित वडा नं. ३ क्षेत्र ४ ठो लडियासे घेरल क्षेत्र रहल बटैटी उहाँ गैल सावन १४ गते आइल बाढसे ७५ प्रतिशत घरधुरी प्रभावित हुइल बटैलै । टमान दातृ निकायसे प्राप्त हुइल राहत सामग्री क्रमिक रुपमे निरन्तर वितरण करटी आइल वडा अध्यक्ष चौधरी बटैलै ।

यहेबीच भजनी नगरपालिकाके उपप्रमुख छाँया देवकोटा अप्नेहुक्रे सक्कु वडामे राहत वितरण करटी आइल बटैली । भजनी नगरपालिका प्रत्येक साल बाढके कारण बरवार धनजनके क्षति व्याहोरटी आइल बटैटी उहाँ नगरवासीहुकनहे सेकटसम राहत वितरण करटी आइल जनैली ।
मुक्तकमैयासहित विपन्न समुदायके उत्थानमे काम करटी आइल समाज बाढ पीडित किल नाई कोरोनामारीसे प्रभावित क्षेत्रमे फेन राहतके सामान वितरण करटी आइल बा ।

हाले गर्भवती तथा सुत्केरी महिला, आपांगता हुइल मनैनहे खाद्यन्नलगायत पोषणयुक्त खैना चीज, सेनेटरी प्याडलगायत सामान वितरण करसेक्ले बा ।

जनाअवजको टिप्पणीहरू