हौसलपुरमे विजली बरल
पहुरा समाचारदाता
हसुलिया, १८ कुवाँर । सुगम जिल्ला कैलालीके दुर्गम मन्ना हौसलपुर गाउँमे अँटवारसे बिजली बरल बा । प्रदेश सरकार, कैलारी गाउँपालिका ओ नेपाल विद्युत प्राधिकरणके संयुक्त लगानीमे उ गाउँमे विद्युत पुगाइल हो ।
प्रदेश सभा सदस्य वीरमान चौधरी, कैलारी गाउँपालिकाके अध्यक्ष लाजुराम चौधरी ओ वडा नम्बर ७ के वडा अध्यक्ष कमलप्रसाद चौधरी संयुक्त रुपमे ओकर उद्घाटन करलै ।
कैलारी गाउँपालिका–७ स्थित मोहना लडिया पार नेपाल–भारत सिमानामे रहल हौसलपुर गाउँ बहुट दुर्गम मानजाइठ । विगतमे राज्यके सेवा सुविधासे बञ्चित यी गाउँके स्थानीय अधिकांश कार्यके लाग भारतमे निर्भर रहटी आइल रहे । सरकार ओ सरकारी निकायके पहुँच हौसलपुरसम पुगे नइसेकल रहे । मने, स्थानीय सरकार गठनपाछे भर हौसलपुरमे क्रमिक रुपमे विकास हुई लागल बा । राज्यसे प्राप्त हुइना सेवा सुविधा गाउँवासीसे पाई लागल बाटै कलेसे स्थानीय सरकार ओ सरकारी निकायके उपस्थितिसमेत विल्गाई लागल बा ।
दुर्गम हौसलपुरमे २८ घरधुरी रहल बा । बिजली बरलपाछे स्थानीय खुशी हुइल बाटै । ओइने विद्युत पुगलपाछे भोज करके खुशीयाली मनाइल जनागिल बा । हौसलपुरमे विद्युत पुग्लेसेफे उ गाउँमे अभिन सुगम माने नइसेक्ना वडा अध्यक्ष चौधरी बटैलै ।
‘मोहना लडियामे पुल, उ गाउँमे विद्यालय निर्माण नइहुइटसम हौसलपुर दुर्गम रही, उहाँ कहलै । ‘लडियामे झोलुङे पुल निर्माणके प्रक्रिया आघे बह्राइल बा ।’ लडियामे पुल नइहुइल कारण बर्खायाममे हौसलपुरसम ओहोदोहोर कैना कठिन हुइना करठ । लाउक भरमे उ गाउँवासी लडिया नघटी आइल बाटै । ओस्टेक करके, विद्यालय नइरहल कारण गाउँभरिक बालबालिका छिमेकी राष्ट्रके विद्यालयमे अध्ययन कैना बाध्य बाटै ।
हौसलपुर गाउँक लाग अभिन ढेर कार्य कैना बाँकी रहलेसेफे एक ठो भारी काम सफल हुइल वडा अध्यक्ष चौधरी बटैलै । ‘विद्युतीकरण हुइलपाछे हम्रे जनप्रतिनिधि अत्यन्त खुशी हुइल बाटी, उहाँ कहलै । यी आघे, विद्युत नइपुगल कारण उ गाउँके स्थानीय टुकी ओ सोलारके भरमे गुजारा करटी आइल रहिट । आब ओइनके उ बाध्यता हटल बा । उ गाउँसम विद्युत पुगाइक लाग गैल आर्थिक वर्षसे काम सुरु करल रहे । कैलारी गाउँपालिकाके कुछ ठाउँमे अभिन विद्युत पुग्न बाँकी रहल जनाइल बा । विद्युतीकरणके लाग घोडाघोडी सहकारीसे ठेक्का लेहल ठाउँमे अभिनफे विद्युत पुगल नइहो ।
