पुर्जि जारी हुइलपाछे वडाध्यक्ष फरार, सेवा प्रभावित
पहुरा समाचारदाता
धनगढी, २६ कुवाँर । कैलालीके कैलारी गाउँपालिका वडा नम्बर ९ के वडाध्यक्ष खेमराज चौधरी विरुद्ध पक्राउ पुर्जि जारी करगिल बा ।
वन अतिक्रमण करल कहटी उहाँ विरुद्ध डिभिजन वन कार्यालय कैलाली पक्राउ पूर्जि जारी करल हो ।
वडाध्यक्ष चौधरी जेसिबी मेसिन प्रयोग करके करिब ०.४ हेक्टर वन क्षेत्र विनाश तथा अतिक्रमण करल डिभिजन वन कार्यालय कैलाली जनैले बा ।
वडा नम्बर ९ वनकनरीस्थित समाज सुधार सामुदायिक वनके पूरुव, पश्चिउमे टलुवा, उत्तरमे स्थानीय मायाराम चौधरीके आवादी जग्गा ओ दक्षिणमे डगरबीच पर्न जग्गा अतिक्रमण करल डिभिजन वन कार्यालय कैलाली जनाइल हो । उहाँ अतिक्रमण करके ओहे ठाउँमे टहरा समेत बनाइल बटागिल बा ।
उहाँ विरुद्ध कुवाँर १९ गते पक्राउ पुर्जि जारी कर्लेसे फेन पक्राउ भर अभिन नैकरगिल हो । उहाँ फरार रहल बाटै ।
डिभिजन वन कार्यालय कैलालीके प्रमुख रामचन्द्र कंडेल वन अतिक्रमण करलपाछे जिल्ला अदालत कैलालीसे पक्राउ आदेश जारी करल बटैलै । उ घटनाके अनुसन्धानके लाग अनुसन्धान अधिकृत तोकके प्रक्रिया आघे बह्रल बटैटी उहाँ वडा अध्यक्ष चौधरी विरुद्धके मुद्दा आघे बह्रल बटैलै ।
मने एक हप्तासम पक्राउ करे नैसेकलपाछे स्थानीयबासी वन कर्मचारी ओ वडा अध्यक्षबीच मिलेमतोके आशंका व्यक्त कर्ले बाटै ।
यहेबीच अख्तियार दुरुपयोग अनुसन्धान आयोग फेन उ घटनामे चासो व्यक्त कर्ले बा । आयोग कञ्चनपुरके सूचना अधिकारी टोपबहादुर बिष्ट अनुसन्धान प्रक्रिया जारी रहल बटैलै ।
पक्राउ पुर्जि जारी हुइलपाछे वडाध्यक्ष चौधरी फरार हुइलपाछे वडा कार्यालयके सेवा प्रवाह प्रभावित हुइल बा । वडा सदस्य हरिप्रसाद चौधरी कार्यवाहक फेन नैतोकलओरसे सेवाग्राहीहुक्रे खाली हात हात फर्कन बाध्य हुइल बटैलै ।
