चौलानी डिपार्टमेन्टलमे कार्यरत १६ कर्मचारीनमे कोरोना पुष्टि

पहुरा समाचारदाता
धनगढी, १ कात्तिक । धनगढी मुख्य बजारमे रहल चौलानी डिपार्टमेन्टल स्टोरमे कार्यरत १६ जाने कर्मचारीमे कोरोना संक्रमण पुष्टि हुइल बा ।

वहाँ कार्यरत एक सय १८ जाने कर्मचारीमे कोरोना परिक्षण करलमे १६ जनहनमे संक्रमण पुष्टि हुइल हो । चौलानी डिपार्टमेन्टल स्टोरके प्रबन्ध निर्देशक मानसिंह साउँद संक्रमण पुष्टि हुइल सक्कु कर्मचारी होम आइसोलेसनमे बैठल जानकारी डेलै । कार्यरत एक सय दुई जनहनके रिपोर्ट भर नेगेटिभ आइल उहाँ बटैलै ।

संक्रमण डेखल कर्मचारी चौलानी गु्रपअन्तर्गत चौलानी डिपार्टमेन्टल स्टोर ओ चौलानी बुकमे कार्यरत रहिट । चौलानी रेष्टुरेन्टमे कार्यरत कर्मचारीमे भर संक्रमण नाइ डेखगैल प्रबन्ध निर्देशक साउँद जानकारी डेलै । स्वास्थ्य सुरक्षाके मापदण्ड अपनाके चौलानी डिपार्टमेन्टल स्टोर आपन सेवा जारी राखल उहाँ बटैलै ।

प्रबन्ध निर्देशक साउँदके अनुसार संक्रमण डेखल कर्मचारी बैठ्ना स्थान सेनिटाइज कैनाके साथे स्वास्थ्य सुरक्षाके मापदण्ड अपनाके डिपार्टमेन्टल स्टोर सञ्चालन हुइटी रहल बा । कार्यरत कर्मचारी ओ ग्राहकके स्वास्थ्य सुरक्षाहे ध्यानमे राखके सेवा डेटी रहल चौलानी ग्रुप जनैले बा ।