लर्कनक बह्राईसङ्ग मौलिक भाषा विकासम फे चेट लगाई

सक्कु जहनक डाईबाबाक मन आपन लर्कापर्कान सब चिजक गुन सिखाक चट्टुर बनाइना बाटम सुर्टा रठिन । गुन सिखि ट काल्ह जाक जिन्गि जिना लिरौसी हुइसेकि कठ । ओहओर्से, मुरिभर्क सौकि (ऋण) रलसे फे सेक नैसेक डाइबाबा आपन आपन लर्कापर्कान गुन सिखैना बहानम सहर बजार, देश डुन्याभर पह्र पठाइ डटल बाट । कुछ लर्का डाइबाबाक डेखल सपना निम्जैेठ ट कुछ भर डगर भुटभुटा जैठ ओ अढ्कच्र छोरडेठ ।

गुन सिख्ना पहिल खड्ढु (चरण) कलक जो बोलि हो । आज डुन्याम पसपौहा जट्रा बल्लगर ओ चट्टुर डेखपर्लसे फे मनैनक आघ कुछ उपाइ नैसुझठिन्, सब मनैनक अर्टि मन्ठ ओ मनैनसे डरैठ । ओइन्ठे आपन बाट, जनाउकर्ना (संकेत) बहुट कम बाटिन । आपन बोलि बट्कोहि औरजहन सुनाइ नैसेक्लक ओर्से ओइन आज पसपौहा, जिवजिन्वार कठिन् । मनैनसे कैयौ गुना जब्बर ओ बल्गर रल्हसे फे बुद्धिभर कम बाटिन । घरक पाल्टु जिन्वार रह या सर्कसक हाँठ्याघोर्वा, चप्का डेख्टि कि छुलुक छुलुक मुट्ठ ओ मनैनक अह्राइल अर्टि मानक पर्ठिन । ओइन्क आघ मनै भुस्नि (एकडम छोट) बिल्गैलसे फे ओइन्से कैयौँ गुना दिमाकदार बाट, उ हो बोलि भाषाक विकाससे । आज डुन्यामभर झँक्लसे धन, दौलत, बल, मजा पद सबकुछ ओह बोल्नाहा मनैनक कब्बजम बा कलसे फरक नैपरि ।

भाषा विकासक नाँउ उड्गरैलसे भर्खिरिक जरमना लर्कनक बह्राइसे गोँरि डार परि । लर्का लग्ढार औरक बोलि ओनाइ सेक्ठ, बोल सेक्ठ, ढिरढिर पह्र फे सेक्ठ ओ लिख । यि सक्कु बाटसे छोट लर्का रह या बुह्राइल मनै, नैमुअटसम आपन गुन ओ बिचारह हरडम चाक्कर ओ फेक्डार करैटि रठ । यिह बाटसे मनै आज धर्तिम सब्बसे बुड्ढयार जात हुइट ओ धर्तिह (प्रकृति) फे लल्कार (चुनौति) लग्ल ।

भाषा विकाससङ्ग बोलि ओनैना कलक पहिल काम हो । आपन मौलिक भाषा विकास करक लाग अघट्यक पुर्खनक बोलि बट्कोहि ओनैना ओ आपन छोटछोट लर्कापर्कन सुनैना एकडम जरुरी बा । खासकैख १० बर्खासे टरक लर्कापर्कन भाषाक विकासम बहुट चेट लगाइक पर्ना बाट बालमनोबैज्ञानिक ओ दार्शनिकहुकन कहाइ बाटिन । जट्रा मजामजा ढ्यार बाट लर्कन सुनाइ सेक्बि, उ ओट्रै हालि हालि सिखि । शुरुम छोट लर्का बोल नैसेक्ठ टब्बु फे ओनाइ भर सेक्ठ । दिन, पाख कट्टी जाइठ ओ ढिरढिर बोल फे डटजैठ । भाषाक गुन, शब्दक गुन करट करट पुरा फट्कारसे (स्पष्ट) बोल फुटजैठिन् ।

कुछ बाल मनोबैज्ञानिकहुकनक कहाई, लर्का जरमनासे २ महिना पहिलसे ढिँर्हिक भिट्टरसे फे ओनाइ सेक्ठ हुँ । ओहमार गाभिल मेँढारु आपन प्याटिम रहल बच्चनसे बोलि बट्कोहि लगैलसे मजा हुइठ कठ । महाभारतम फे कहल बा कि बिर अभिमन्यू फे आपन डाईक ढिँर्हिमसे चक्रव्यूक सब बाट जानडर्ल रहै हुँ । ओहमार, छोट लर्कन मौलिक बोलि सिखाइक लाग मजा मजा बाट बटैना, आपन जिन्गिक भोगल बाट ओ सिखल गुन बट्ना जरुरी बा । अघट्यक पुर्खनक बट्कोहि, करल मजा काम, ओनैटि मजा लग्टिक (प्रेरणादायी) काँटाफुल्ना बाट आपन लर्कन सुनैना ओ सिखैनाम चेट लगाइक पर्ना बा ।

छोट्हसे लर्कनसे खोट्लारसे बोल्लसे हुक्र फे खोट्लारसे बोल्ना बान पर्ठिन । ओ सुनल बाट खोट्लारसे लौटैना कोशिस कर्ठ । लर्कन बिह्रैना, गन्जा बान (व्यवहार) सिखैना, हेक्लैना कर्लसे ओस्टक लर्का फे औरक बोलि सुन्क सिख्ठ । ओहमार, चट्टुर मनैनक लर्का चट्टुर ओ गन्जा मनैनक लर्का ढ्यार आपन डाइबाबाकहस बान सिख्ठ । ओहमार लर्कनक ओनैना ओइन्क बोलि बिकाससे जोरल रहठ । जब लर्का छोट्हसे सुन नैसेकि कलसे उ गन्जा, लाट, खोँट्लार, गोग्डाहा मेरिक डेखपर्ठ ओ डाईबाबाक कहल बाट फट्कारसे बुझनैसेक्ठ ।

जौन लर्का बाट मजासे ओनाइ सेक्ठ, उ हरडम कनकनार, चोड्गर ओ हसमुख डेखपर्ठ । डाईबाबाक लगाइल अर्टि फे झट्कारसे पुरा कर्ठ । जब लर्का फट्कारसे सुन नैसेक्ठ, ओइन्क ढिरढिर बोल्ना फे कम हुइटि जैठिन काकर कि औरक कहल बोलिह ओइन फर्छैना कर्रा परलग्ठिन । ओहआर्से, आजकाल डक्टारम (अस्पताल) जरमटि कि लर्कनक सुनसेक्ना बाट फे जँच्ठ । नैजाँच हुइल हो कलसे भर्खरिक जरमना लर्कन जँचैना एकडम जरुरी बा टाकि लर्कनक बिर्वाबुटि सहजे करसेक्जाइ ओ ओइन्क बिकासम कौनो मेरिक बेँन्ह्वा नालाग ।

कुछ बाट यहाँ छोट लर्कनक शारीरिक, बौद्धिक, मानसिक विकासकसङ्ग भाषा विकासक बाट यहाँ बिट्खोर खोजल बा ।

लर्कनक मौलिक बोलि विकासक पहिल खड्ढु कलक रुइना हो । भर्खर जरमल झरबडके लर्का औरक बाट ओनाइ ट सेक्ठ टब्बु फे लौटाइ नैसेक्ठ । आपन बाट सुनाइक लाग च्यँहर च्यँहर रुइठ । चाहे भुख लाग्क हो या कौनो मेरिक जिउम पिरबट्ठासे आँङ्ग ढिक्क । सब बाट ओइन रो रो सुनैठ, टब्बु हम्र सहजे यि ट महा पिच्का (रुइटि रना) लर्का बा कबो, ओइनक भाषाम कम ध्यान डेजाइठ ।
तीन महिनासमक लर्कनक बोलि कुँई कुँई सुनमिलठ । बोलि निकर्ना कोशिश कर्ठ । मुहमसे पुचपुचि ठुक निकर्ठ । दिनभरहस आपन हाँठगोरक अंग्रि मुहसे किम्भोँर कर्ठ । यि उमेरक लर्कन किउ किउ हुक्का भर्ना हुइल बा फे कठ । यि ब्यालम लर्का स्वरबर्ण, इ, ई, अ, आ,उ,… जसिन बोलि फुट लग्ठिन । आपन डाइबाबानक क्वारा फे चिन्ह भिर्जैठ ।

लौव (आधुनिक) भाषाबिद् अमेरिकन दार्शनिक, नोम चोमस्कि भर डान्चे फरक बिचार बाटिन् । उ कठ, लर्का जन्मजात (इन बर्न थ्योरी) आपन मौलिक भाषाक गुन लिरौसीसे सिख सेक्ठ हुँ । आँजर पाँजरक माहोलसे भाषा विकासम ओट्रा ढ्यार छाँहि फैलाइनैसेकठ । भाषा विकाससङ्ग लर्कनक आपन मौलिक भाषाम भर मन, चाह, शौक, जैना जरुरी बा ।

छोट लर्कनक डेँह महाहालि बाह्रट बिल्गठ । जब लर्का ६ महिनासे उप्पर हठ्लग्गा हुइठ । आपन डाइबाबानके बाट बुझ लग्ठ । गिजिक गिजिक हाँस लग्ठ । ढुढ्या दाँत फे निक्रलग्ठिन ओ ढिरढिर बोलि फे फुटलग्ठिन । व्यञ्जनवर्ण मिलाक बा, बा, मा, मा, का, का जसिन बोलि निकार लग्ठ । यि ब्यालम लर्का डान्चे रिस फे डेखाक आपन बान (व्यवहार) जनैठ । मनैन चिहिनक क्वाँरम जैना ओ खेल्ना शुरु कर्ठ ।

लर्का जब ९ महिना पुग्ठ । मन चुम्मर रलसे एक्क बाट डोहोर्या डोहोर्या बोल डटजैठ । जस्ट कि, बा बा, पा पा,डा डा । यिहिह अंग्रेजीम इकोलालिया कठ । यि उमेरक लर्कनक फट्कारसे व्यञ्जनवर्णम टेँट्वा फुट्जैठिन । कुछ व्यञ्जनबर्ण दाँतक सहरासे खोट्लार हुइलसे फे बोल्कार (उच्चारण) लग्ठ ।

१२ से १८ महिना उमेरक लर्का छोट छोट शब्द मिलाक बोल सिख लग्ठ । हुक्र फट्कारसे बाबा, मामा, पापा, डाडा, काका सब कह लग्ठ । लर्कनक भाषा विकासक यि खड्ढुह अंग्रेजीम होलोफ्रेज कठ । यि ब्यालम लर्का आपन बाट और जहन सुनैना कोशिस करलग्ठ ।

जब लर्का डेढ से दुई बर्खा लग्ठ । लर्का सुनाउ (सर्वनाम), लच्छिन (विश्लेषण) फे घुसाघुसा खोट्लार हुइलसे फे बोल लग्ठ । जस्टक टैँ, मैँ, जुर पानी, टाटु.. (टाटुल) भाट कह जानडर्ठ । लर्का आपन मौलिक बोलिह सहजसे पक्रलग्ठ ।

लर्कनक उमेर बहर्टि जैठिन, जब ३० महिनाक पुग्ठ ढिर ढिर व्याकरण, लिंग, बचन,नाँउ सब मेरिक गुन सिख डर्ठ ओ मिलाख बोल लग्ठ । अस्टहक जब लर्का ९ से १० बर्खा पुरा कर्ठ ओइन्कम मौलिक भाषा विकासक पुरापुर गुन सिख डर्ठ । ओहमार, १० बर्खासे अलारि लर्कन मौलिक भाषा सिखैनाम डाईबाबा, बुडिबुबा, घर पर्यार, गैगोट्यार, आँजरपाँजरक लहपट्टर हुकनक पाठ (भूमिका) ढ्यार काम लागट । यि उमेरक लर्कन मौलिक भाषा सिखक लाग माहोल बनाडेना जरुरी बा । ढ्यार जसिन डाइबाबा आपन लर्कनसे आपन मौलिक बोलिम बोलक छोर्क आनक भाषाक सहारा लेहल डेखपरठ । ओह ओर्से अब्ब ढ्यार बोलि भाषा संकटम पर्टि जाइटा । यिहिम डाइबाबा ध्यान डेना जरुरी बा ।

भाषा विकासक ओर ढ्यार दार्शनिक ओ बालमनोबैज्ञानिकहुक्र आपन फरक फरक बिचार फैलैल बाट । लर्कनक भाषा बिकास, आँजरपाँजरक माहोलम भर परठ कैक अमेरिकन मनोबैज्ञानिक बि.एफ.स्किनर कठ । लर्कनक बैठना ठाँउ, रानपरोसक बोलि बट्कोहि, रिटभाँट, नाँचगान, गित, मृडंग, चालचलन, रहान, यि सब चिजसे लर्का आपन मौलिक बोलि सिक्ठ हुँ । आँजरपाँजरक माहोलसे लर्का सब चिजक नक्कल उटार (अनुसरण) लग्ठ । मजा नैमजा चिजिक फेर्को (पुर्नबल) बेल्सठ । अस्टक ओइन्क बेल्सल मौलिक भाषाक बिकास लग्ढार बेल्सलक (अभ्यास) ओर्से लर्कनक मौलिक भाषा बिकास फे ओस्टक हुइट चलाजैठिन ।

लौव (आधुनिक) भाषाबिद् अमेरिकन दार्शनिक, नोम चोमस्कि भर डान्चे फरक बिचार बाटिन् । उ कठ, लर्का जन्मजात (इन बर्न थ्योरी) आपन मौलिक भाषाक गुन लिरौसीसे सिख सेक्ठ हुँ । आँजर पाँजरक माहोलसे भाषा विकासम ओट्रा ढ्यार छाँहि फैलाइनैसेकठ । भाषा विकाससङ्ग लर्कनक आपन मौलिक भाषाम भर मन, चाह, शौक, जैना जरुरी बा ।

ओस्टह बालबिकास ओ बालमनोबैज्ञानिक जिन प्याजे फे डान्चे नोम चोमस्किक बिचारसे सझ्या डेखपर्ठिन । उ कठ, लर्कनम भाषा ओ विचार जन्मजात एक्क रठिन हुँ । ढिरढिर जन्मजात रहल गुनह फेक्डार करैटि जैठ । अब्ब भर लर्कनक मौलिक भाषा विकासम और भाषाक छाँहिसे यि गुनक घ्याँघा बुज्टि जाइटा ।

उप्पर अंग्रयाइल भाषा विकासके बाट ओ दार्शनिकहुकनक बाट ओनाइ बेर एक बाट भर पक्का बा कि आपन लर्कन मौलिक भाषा सिखैना बा कलसे ओइन्से समय मिलाख साँन्झया बिहन्या आपन भाषाम बाटचित कर परल, नेपाली, अंग्रेजी ओ और भाषा ट पाठशालम सिखजैहि । घरक लर्कन पुर्खनक बाट बट्कोहि ओनैना बान लगा डेह परल । लर्कनक बह्राईसङ्ग आपन मौलिक भाषा बिकासक लाग चेट लगाई परल । कुछ लर्का एक बर्खा पुरापुर हुइल ब्यालम फे बाटचिटम चिल्वास नैडेखैठ, नैसुनलहस कर्ठ, ओ जिउम कौनोमेरिक जनाउ नैडेखाइठो कलसे डक्टार लैजाक हालिसे बिर्वाबुट्टी कराइक परल । ओस्टक २ बर्खा पुरा हुइल लर्का कम्तिम ५० शब्दसम फे बोल नैसेक्ठो कलसे डक्टर्वाह डेखाइना जरुरी बा । आपन लर्कनक बोलि बिकासम ध्यान नैडेलसे ओइन्क ढ्यार चिजक विकासम रुकावट अइठिन् । ओहओर्से लर्कनक भाषा विकासक लाग समय रटि चेट लगाई ओ आपन लर्कन हौस्यार बनाई ।

जय गुर्बाबा ।

लेखक दहित थारू समुदायके भाषा, कला, संस्कृतिमे नियमित खाेजमूलक लेखमार्फत कलम चलुइया पहुरा थारू दैनिक पत्रिका व पहुरा डटकमके नियमित स्तम्भकार हुइट ।