महाकाली करिडोर जोर्ना सडक निर्माण हुइटी

पहुरा समाचारदाता
कञ्चनपुर, १९ कार्तिक । भीमदत्त नगरपालिकाके गड्डाचौकीसे ब्रह्मदेव महाकाली करिडोरहे जोर्ना सडक निर्माणके लाग प्रक्रिया आघे बर्हाइल बा । गड्डाचौकीसे जिमुवा हुइटी तुमडानी होके ब्रह्मदेव करिडोरसम सडक निर्माण करे लागल हो ।

करिडोर जोर्ना ११ किलोमिटर सडक निर्माणके लाग चालु आवमे रु तीन करोड ७० लाख बजेट विनियोजन करल बा । सडक डिभिजन कार्यालयसे ठेक्का कैके सडक निर्माणके काम आघे बर्हाइ लागल हो ।

सडकके गत बरस डिपिआर (विस्तृत परियोजना प्रतिवेदन) तयार कैके सर्भे करल रहे । स्थानीयवासीके सहमतिके आधारमे ब्रह्मदेवसम महाकाली करिडोर ओ दोधारा चाँदनीके सुक्खा बन्दरगाहसमके छ लेन सडकसम जोर्ना मेरके १० मिटर चौडा सडक निर्माण हुइना हुइल बा ।

सडक डिभिजन कार्यालयके प्रमुख सुनिलकुमार कर्ण स्थानीयवासीके सहमतिमे सडक निर्माणके काम आघे बर्हना बटैलै । निर्माणके लाग लागत अनुमान तयार कैके आघे बर्हब । अब्बेक बजेटसे कत्रासम हुइठ्, ओम्ने काम करब”, डिभिजन प्रमुख कर्ण कहलै, “लागत तयारी कैके ठेक्का कैके यी बरस सडकके ट्र्याक खोल्न काम हुइ ।”

भीमदत्त नगरपालिकाके प्रमुख सुरेन्द्र विष्ट सीमा क्षेत्रमे बैठ्टी आइल स्थानीयवासीके माग ओ आवश्यकताके आधारमे गड्डाचौकी सडक निर्माणहे प्राथमिकता डेहल बटैलै । “सीमा क्षेत्रमे बैठुइया जनताके दुःखकष्ट बावै । गैल बरस किनार होके सडक लैजैना खोजल रहे”, उहाँ कहलै, “बजेट फेन रहे, भारतसे अवरोध करलपाछे काम हुइ नाइ पाइल । यी बरस सडक बनाइ लागल बा, यम्ने सक्कु जनहनके साथ ओ सहयोग हुइना आशा बा ।”

दोधारा चाँदनीके सुक्खा बन्दरगाह ओ महाकाली करिडोरहे जोर्ना मेरके सडक निर्माण करजैना हुइलपाछे राष्ट्रिय राजमार्गके रूपमे विकास करजैना उहाँ बटैलै । महेन्द्रनगर–ब्रह्मदेव तिकंररोडसे ब्रह्मदेव जोरल बा, गड्डाचौकी होके महेन्द्रनगर हुइटी ब्रह्मदेव फेन जाइ सेकजैना मेरके उ सडक निर्माण हुइना हुइल बा ।