फुटल खानेपानी पाइप सुधारके कालोपत्रे करी
धनगढी उपमहानगरपालिका धनगढीके कैलाली पुलसे क्याम्पस रोडसम मुख्य सडकमे कालोपत्रेके काम आघे बह्रले बा । अव्यस्थित धनगढी बजारके मुख्य सडक साकिर बा, सडक साकिर हुइल कारण यात्रुहुकनहे दैनिक आवटजावटमे कठिनाई भोगे परल बा । सडक साकिर बा, मने सवारी साधनके दिनदिने संख्या बह्रटी बा, जिहीसे सडक जाम हुइना, दुर्घटनाफे बह्रटी गैल बा, व्यापारिक प्रयोजनके लाग बनाइल सटरके आघे खाली ठाउँ नइछोरल कारण किनमेल करे अउइया ग्राहक रोडमे सवारी साधन रोके पर्ना अवस्था बा ।
अब्बेक पीच हुइल सडकके दायाबाँयाके भाग ओर ठप पिच करटी नगरपालिका डगर चाकिर बनैना काम करटी बा । उ सह्रनीय काम हो, मने सडक क्षेत्रमे रहल खानेपानीके टमान ठाउँमे पाइप फुटल बा, जौन सडकहे विगरना काम करठ । नगरपालिका खानेपानीके फुटल पानी विन सुधार पिच कैना तयारी करले बा । खानेपानीक पाइप विन सुधारल पीच करले थोरिके दिनमे सडक फुटे सेकी, ओ अब्बेक लगानी बालुमे पानी डरना बराबर हुई ।
धनगढी बजारके मुख्य सडक आँजरपाँजर रहल ढल निकास ओस्टेफे मजा नइहो, ठोरिक पानी बरसटिकी पानी जम्ना समस्या बा, जिहीहे रोड बहुट हाली खराब हुइठ । खानेपानी पाइप व्यवस्थित नइहुइल कारण पाइप फुटिकी सडक खोडे परठ । नगरपालिका एक फेरा जे सडक कोरी अपनही बनाई कना निर्णयफे करले रहे । मने निर्णय कार्यान्वयन नइहुईल । अब्बे टे कोरोनाके कारण महोत्सव, खेलकुड, महायज्ञ लगैना जैसिन सक्कु कार्यक्रम बन्द बा, नाइटे सडकके ठाउँ–ठाउँमे स्वागत गेट बनाइल प्रचलन बा, उहीसे ढेर रोड खराव हुइटी रहे ।
अब्बे पीच करटी बजारके मुख्यसडक सुधार हुइटी बा, मने फुटल खानेपानी पाइप सुधार करके कैना पिच कैना जरुरी बा, ओहोर धनगढी उमहानगरपालिकाके ध्यान जैना चाही नइकी पीच करल कौनो काम नइलागी ।
