धनगढीसे तीन लउण्डीनके उद्धार

पहुरा समाचारदाता
धनगढी, २० कार्तिक । धनगढी बसपार्कमे रहल न्यु बडी केदारमे धारल तीन लउण्डीनके उद्धार करल बा ।

भारतमे लैजाके बेचबिखन करेक लाग धनगढी नानलके धारल १७, १८ ओ १९ वरसके उ लउण्डीके बुधके रात उद्धार करल जिल्ला प्रहरी कार्यालय कैलालीके प्रवक्ता प्रहरी नायव उपरीक्षक प्रतीक विष्ट जानकारी डेलै । दुई लउण्डी सर्लाहीके ओ एक जाने सिन्धुलीके हुइट ।

त्रिनगर नाका हुइटी भारत पुगाई लागल सूचनाके आधारमे परिचालित टोली उ लउण्डीनके उद्धार करल जिल्ला प्रहरी कार्यालय कैलालीके प्रवक्ता प्रहरी नायव उपरीक्षक विष्ट जानकारी डेलै । ओइनहे शान्ति पुनःस्थापना गृहके सेफ हाउसमे धारल बा ।

अनुसन्धानके लाग प्रहरी होटेल सञ्चालक टेकेन्द्र बडैलासहित ४ जनहनहे पक्राउ करले जनैले बा । ओइनहे सर्लाही ओ सिन्धुलीसे यहाँसम कैसिक नानगिल कहटी अनुसन्धान हुइटी रहल प्रवक्ता विष्ट जनैलै ।