थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ सावन २६४६, अत्वार ]
[ वि.सं २९ श्रावण २०७९, आईतवार ]
[ 14 Aug 2022, Sunday ]
‘ नवज्योति कृषि सहकारीके १२ औं वार्षिक साधारणसभा ’

७ करोडसे ढेर निक्षेप संकलन

पहुरा | २३ कार्तिक २०७७, आईतवार
७ करोडसे ढेर निक्षेप संकलन

पहुरा समाचारदाता
धनगढी, २३ कार्तिक ।
नवज्योति कृषि सहकारी संस्था लिमिटेड ७ करोड ५ लाख १८ हजार ६ सय ३१ रुप्या ८८ पैसा निक्षेप संकलन कैना सफल हुइल बा ।

धनगढी उपमहानगरपालिका वडा नम्बर ७ मे रहल उ सहकारी गैल बरस ६ करोड ३६ लाख ३७ हजार ८५ रुप्या २२ पैसा निक्षेप संकलन करलेसेफे २०७७ सालके असार मसान्तसम ६८ लाख ५१ हजार ५ सय ४६ रुप्या ढेर संकलन करटी अब्बेसम ७ करोड ५ लाख १८ हजार ६ सय ३१ रुप्या ८८ पैसा निक्षेप संकलन पुगैना सफल हुइल अध्यक्ष सीताराम राना बटैलै ।

२५ जाने शेयर सदस्यसे एक दशक आघे सुरुवाट करल संस्थाके शेयर पुँजी ढाई लाख केल रहे । यी सहकारीमे अब्बे ५ सय ७४ जाने शेयर सदस्य बाटै । संस्थाके अधिकृत पुँजी अब्बे १ करोड रहल बा । जेम्नेसे २०७६ साल असार मसान्तके शेयर पूँजी ४३ लाख ६० हजार रहलमे २०७७ असार मसान्तसम चुक्ता शेयर पूँजी ५३ लाख ९० हजार पुगल अध्यक्ष जानकारी डेलै । २०७६ असार मसान्तसम जगेडा कोषमे २२ लाख ८३ हजार १ सय ६५ रुप्या ३२ पैसा पुगल उहाँ जनैलै ।
संस्थासे आर्थिक बर्ष २०७६/०७७ सालमे ६ करोड ७ लाख ७ सय २६ रुप्या कर्जा प्रवाह करले बा । कलेसे आर्थिक बर्ष २०७५/०७६ सालके असार मसान्तसम ५ करोड ५७ लाख ५९ हजार १ सय ६ रुप्या कर्जा प्रावह करले रहे ।

संस्थाके शेयर सदस्यहुकनके आर्थिकस्तरमे बृद्धि तथा सामाजिक आवश्यकता परिपूर्ति कैना उद्देश्यसे यी सहकारी कर्जा लगानी ओ असुलीमे समय सपेक्ष परिमार्जन करटी कर्जामे टमान शिर्षक कृषि, व्यापार, हायर, प्रचेज, घर निर्माण, शीर्षकमे कर्जा प्रवाह करटी शेयर सदस्यहुकनहे स्वारोजगार तथा आत्मनिर्भरमे सहयोग करले बा ।

सहकारीके आर्थिक बर्ष २०७६/७७ सालके प्रगती विवरणमे शेयर सदस्यहुकनके आर्थिकस्तर बृद्धिके लाग सहुलियत व्याजदरमे ऋण उपलब्ध करैना, संस्थाके ११ औं साधारण सभासे सहकारी ऐन २०७४ बमोजिम यी संस्थाके विनियम संशोधन करके स्वीकृत हुइल, संस्थाके अपने जग्गामे भवन निर्माण करके कार्यसंचालन करटी रहल अध्यक्ष सीताराम जनैलै ।

संस्थाके आर्थिक बर्ष २०७७/०७८ के लाग लक्षित कार्यक्रमफे घोषणा करले बा । लौवा कार्यक्रममे शेयर सदस्य बहै्रना, सहकारीसे कृषिमे उपज, मलखाद, विउ विजन, कृषि औजार, नोन, चिनी लगायतके समानके खरिद विक्री करके सुपथ पसल संचालन कैना, सहकारी शिक्षाके प्रचारप्रसार कैना, शेयर सदस्यहुकनके सीप विकास करके स्वारोजगार उन्मुख कराके आर्थिक जीवनस्तर उठैना, संस्थाके कार्यक्षेत्र सामाजिक उत्तरदायित्व कार्यक्रम संचालन कैना, संस्थाहे बहुउद्देश्यीय सहकारी संस्था बनैना पहल कैना, सहकारीके छाता संगठन, स्थानीय निकाय तथा संघ संस्थासंग समन्वय कैना, सामुहिक कर्जा लगानीके लाग आवश्यक नीति निर्माण करके लाग कैना अध्यक्ष जनैले बाटै ।

वार्षिक साधारण सभामे नौ जाने सम्मानित

नवज्योति कृषि सहकारी संस्था लिमिटेड संस्था लिमिटेड अपन १२औं वार्षिक साधारण सभा तथा चौठौ महाधिवेशनके अवसरमे नौ जनहनहे दोसल्ला सहित सम्मान करले बा ।

सम्मानित हुइलमे असल ऋणीओर धनगढी–७ देवहरियाके धनीराम डगौराथारु, धनगढी–१० घुइयाघाटके साहेव राना रहल बाटै ।

कर्मचारी ओर पृथ्वीराम राना, घर निर्माण समिति सयोजक मेघनाथ राना, सदस्य मनोज विक्रम चौधरी, भैलुराम राना,भीराराम राना, लाल बहादुर राना ओ अनिता चौधरी रहल बाटै ।

‘दैनिक ज्याला मजदुरी करुइया व्यवसायके मालिक बन्लै’

नवज्योति कृषि सहकारी संस्था लिमिटेड लिमिटेडके अध्यक्ष सीताराम राना दैनिक मजदुरी करुइया अब्बे व्यवसायके मालिक बनल बटैले बाटै । शनिच्चरके रोज धनगढीमे हुइल संस्थाके १२ औं वार्षिक साधारण सभा तथा चौठौ महाधिवेशनके उदघाटन शत्रमे बोल्टी उहाँ एक दशक आघे संस्था खोल्न बहुट कठिनाई भोगे परल अनुभव सुनैलै ।

‘लर्कन पह्राइक लाग, चेलिनके भोजविहा, पसल संचालनके केल लाग धनगढीके भारी भारीमे बैकमे ऋण निकारे गैलपाछे ढेर पीडा भोगल परल’, अध्यक्ष राना कहलै, ‘हाई प्रोफइलके मनै केल ऋण पाइट, हम्रे एक टे पिछडा वर्ग समुदायके मनै मजासे बोलेफे नइजन्ना, ऋण लेहक महिनौ बैंक जाई परे ।’ बैकसे ऋण लेना कर्रा हुइलपाटे संस्था खोलेबेर सहकारीप्रति विश्वास नइहुके पैसा खालिही की कहिके शेयर सदस्य खोज्ना ओ लगानी करुइया मनै जुटैना कर्रा रहे अध्यक्ष कहलै । वि.सं. २०६६ सालमे सामुदायिक बचत कोषसे सुरु हुके २०६७ अगहन ५ गते सहकारी प्रशिक्षण तथा डिभिजन कार्यालय धनगढीमे विधिवत रुपमे दर्ता हुइल उहाँ कहलै ।

बजारमे लेवारी करके गुजारा कैना ओ ठोर–ठोर बचल पैसा सहकारीमे जमा करटी आइल शेयर सदस्य सहकारीसे लोन लेके मजा व्यवसायके मालिक बनल अध्यक्ष राना बटैलै ।

ओस्टेक कार्यक्रमके वडका पहुना रहल सुदूरपश्चिम प्रदेशसभा सदस्य टेकबहादुर रैका नवज्योति कृषि सहकारी कम समयमे मजा फडको मारल चर्चा करलै । उहाँ कहलै, यी सहकारीके शेयर सदस्य व्यापार व्यवसाय करके मजा आम्दानी कैना सफल हुइट बटै ।

संस्थाके सल्लाकार तथा संविधानसभा सदस्य प्यारेलाल राना कोरोनाके कारण सक्कु क्षेत्रमे आर्थिक अवस्था दयनिय बनाइल बटैलै । उहाँ संस्थासे आर्थिक वर्ष २०७७/७८ मे ठप मजा निर्णय करल ओ कृषकहुकनके लाग लौवा योजना नानल बटैलै ।

जिल्ला सहकारी संघके अध्यक्ष फणीराज सापकोटा जिल्लामे ७ सय ढेर सहकारी रहलमे ८ से १० सहकारीभिटर यी सहकारीफे परल बटैलै । उहाँ जिल्लामे रहल टमान सहकारीसे २०७४ सहकारी ऐन कार्यान्वयन नइकरल बटैलै । राष्ट्रिय सहकारी बैंकके शाखा प्रवन्धक कृष्ण रावल सहकारीहे कृषि क्षेत्रमे विशेष फोकस कैके आघे बह्रना सुझव डेलै । उहाँ कृषिखेती पशुपालन, बजारीकरण कार्ययोजना बनाके आघे बह्रे पर्ना जोड डेलै ।

कार्यक्रममे सहकारीके व्यवस्थापक उग्रसेन राना आर्थिक बर्ष २०७७/०७८ सालके अनुमानित आयव्यय, ऋण समिति संयोजक मनोज विक्रम चौधरी ऋण लगानी सम्बन्धी, लेखा समिति संयोजक भीम पडाल लेखा प्रतिवेदन प्रस्तुत करले रहिट । संस्थाके अध्यक्ष सीताराम रानाके अध्यक्षतामे हुइल कार्यक्रममे उपाध्यक्ष मेघानाथ राना स्वागत मन्तव्य व्यक्त करले रहिट, कलेसे संचालन सचिव भीराराम राना करले रहिट ।

अध्यक्षमे फेर सीताराम

नवज्योति कृषि सहकारी संस्था लिमिटेडके अध्यक्षमे फेर सीताराम राना निर्वाचित हुइल बाटै ।
शनिच्चरके रोज धनगढीमे हुइल संस्थाके १२ औं वार्षिक साधारण सभा तथा चौठौं महाधिवेशनसे वर्तमान अध्यक्ष सीताराम फेरसे अध्यक्ष पदमे निर्वाचित हुइल हुइट । ओस्टेक संस्थाके उपाध्यक्षमे मेघनाथ राना, सचिवमे भीराराम राना निर्वाचित हुइल बाटै ।

ओस्टेक संस्थाके सदस्यमे भजन राना, लीलाकुमारी पौडेल(कोइराला), मनोज विक्रम चौधरी, भैलुराम राना, अनिता चौधरी ओ अनिता चौधरी रहल बाटै । संस्थाके ऋण समिमिमे नरेश राना, अर्जुन चौधरी, लेखा समिति संयोजक भीम पडाल, सदस्यमे वृर्खाराज राना, जीवन राना रहल बाटै । ओस्टेक शिक्षा समितिमे महेन्द्र चौधरी, आशादेवी चौधरी निर्वाचित हुइल निर्वाचन अधिकृत नैनबहादुर वडायक बटैलै ।

जनाअवजको टिप्पणीहरू