अमेरिकाके राष्ट्रपतिमे वाइडेन ओ उपराष्ट्रपतिमे ह्यारिस निर्वाचित
काठमाडौं, २३ कार्तिक । डेमोक्य्राटिक पार्टीके जो बाइडेन अमेरिकाके ४६ औं राष्ट्रपतिमे निर्वाचित हुइल बाटै । मतगणना जारी रहलेसे फेन मतान्तरके कारण बाइडेनहे अमेरिकी सञ्चारमाध्यम विजयी घोषणा करले बा । अस्टेक, उपराष्ट्रपति कमला ह्यारिस निर्वाचित हुइल बाटी ।
बाइडेन अमेरिकी राष्ट्रपतिमे निर्वाचित हुइलसँगे विश्वके टमान देशके सरकारप्रमुख तथा राष्ट्रप्रमुखहुक्रे बधाई डेले बाटै । विश्व राजनीतिक मञ्चमे अमेरिकी गठबन्धनमे रहल बेलायत, फ्रान्स, जर्मनी, युरोपेली युनियन ओ युक्रेनलगायतके मुलुक तथा संगठन राष्ट्रपतिमे निर्वाचिन जो बाइडेन ओ उपराष्ट्रपतिमे निर्वाचित कमला ह्यारिसहे बधाई डेले बाटै ।
अस्टेक, प्रधानमन्त्री केपी शर्मा ओली फेन नवनिर्वाचित अमेरिकी राष्ट्रपति वाइडन ओ उपराष्ट्रपति ह्यारिसहे बधाई ज्ञापन करले बाटै । सामाजिक सञ्जाल ट्वीट मार्फत प्रधानमन्त्री ओली दुनहुनहे अँट्वारके रोज बधाई डेलैं ।
ट्वीटमे प्रधानमन्त्री ओली लिख्ले बाटै, ‘सानदार ओ ऐतिहासिक विजयके लाग अप्नेनहे बधाई बा, नयाँ नेतृत्वसँग लग्गेसे दुई देशके दुईपक्षीय हितके लाग काम करना आशा व्यक्त करटु ।’
महसुर प्रतिद्वन्दी डोनाल्ड ट्रम्पहे हटैटी अमेरिकी राष्ट्रपतिके दौड जिटल बाइडन राष्ट्रपतिके कुर्सीमे औपचारिकरुपमे जनवरीसे बैठे पैही ।
अइना डिसेम्बरमे ५३८ इलेक्ट्रोरल कलेजके प्रतिनिधिहुक्रे मतदान करलपाछे बाइडन राष्ट्रपति बनल औपचारिक घोषणा अमेरिकी संसदसे हुइ । टब, उहाँ जनवरीसे ह्वाइट हाउसके जिम्मेवारी सम्हरहीं ।
अमेरिकाके इतिहासमे बाइडन सबसे वृद्ध उमेरमे निर्वाचित हुइल राष्ट्रपतिके रेकर्ड बनैले बाटै । उहाँ दुई सातापाछे ७८ वर्ष पुगटै । चार वर्षे कार्यकाल पूरा करटसम उहाँ ८२ वर्ष पुग्जैही । यीआघे वृद्ध उमेरके राष्ट्रपतिके रेकर्ड डोनाल्ड ट्रम्प बनैले रहिट ।
समाचार एजेन्सी
