थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ३० सावन २६४६, सोम्मार ]
[ वि.सं ३० श्रावण २०७९, सोमबार ]
[ 15 Aug 2022, Monday ]

स्वास्थ्य सुरक्षा अपनाके डेवारी मनैना आग्रह

पहुरा | २७ कार्तिक २०७७, बिहीबार
स्वास्थ्य सुरक्षा अपनाके डेवारी मनैना आग्रह

पहुरा समाचारदाता
धनगढी, २७ कार्तिक ।
जिल्ला प्रशासन कैलाली स्वास्थ्य सुरक्षाके मापदण्ड अपनाके डेवारी मनैना आग्रह करले बा ।

बुधके रोज प्रमुख जिल्ला अधिकारी यज्ञराज बोहरासे जारी आदेश अनुसार कोभिड–१९ के संक्रमणसे बचक लाग आवश्यक स्वास्थ्य सुरक्षाके मापदण्ड अपनाके मनाइ पर्ना आग्रह करल हो । नेपालमे कोभिड–१९ के संक्रमण दिन प्रति दिन बर्हटी जाके उहीसे मृत्यु हुइना संख्या समेत अप्रत्यासित ढंगसे वृद्धि हुइटी रहल ओरसे डेवारी फेन स्वास्थ्य सुरक्षाके मापदण्ड अपनैना आग्रह करल हो ।

प्रशासनसे यिहीसे आघेक टिहुवार तीज, अँट्वारी, डशैं लगायतमे फेन आवश्यक स्वास्थ्य सुरक्षाके मापदण्ड अपनैना आग्रह करल रहे । अब्बे नेपालीहुक्रनके डेवारी, नेपाल सम्बत, छठ पर्व, ल्होसार फेन लच्याकसेकल बा । यी टिहुवार फेन गैल बरस जस्टे सामान्य अवस्थामे मनाइ सेकजैना अवस्था नाइ रहल ओरसे कोभिड–१९ के संक्रमणसे बचक लाग आवश्यक सावधानी अपनाके मनाइ पर्ना आग्रह करल हो ।

ओस्टके टरटिहारमे हुइ सेक्ना लुटपाट, चोरी, डकैटी, झैझगडा लगायत अपराध तगा आगलागी, विस्फोट जैसिन घटनासे बचक लाग समेत उच्च सतर्कताके साथ संयमित रुपमे स्वास्थ्यके सक्कु मापदण्ड पालना कैके सावधानी अपनैना आग्रह करगैल बा ।

कलेसे उ अवधमीमे देउसी भैलो, कौनो मेरके मेला, जत्रा, महोत्सव, समूहमे खेलजैना खेलकुद प्रतियोतिा तथा मनैनके अनावश्यक भिडभाड ओ जमघट हुइना खालके कौनो फेन कार्य नाइ करे पैना जनाइल बा । ओस्टके कौनो फेन मठ मन्दिर, गुम्बा, चर्च, मस्जित, गुरुद्धारा लगायत धार्मिक ओ सांस्कृृतिक महत्वके स्थानमे नित्य पूजापाठ आराधना बाहेकके मनैनके भेला जम्मा हुइना मेरके पूजा अर्चना, उत्स, भजन, किर्तन, वली लगायत कौनो फेन कार्य नाइ करे पैना कहल बा ।

कलेसे कौनो राजनीतिक दल, संघ संस्था, क्लब, समह ओ सञ्जालसे भेला जम्मा होके शुभकामना आदान प्रदान कैना लगायत कौनो फेन मेरके कार्य नाइ कैना नाइ करे पैना कहल बा ।

उ आदेशके उल्लंघन कैना वा आदेशके पालना कैना करैना कार्यमे अवरोध करुइया जोकुहीहे प्रचलित कानून बमोजिम कारवाही कैना जारी आदेशमे उल्लेख करल बा ।

ओस्टके कञ्चनपुर जिल्ला प्रशासन फेन डेवारीमे स्वास्थ्य सुरक्षाके सक्कु मापदण्ड अपनाके मनैना आग्रह करले बा । प्रमुख जिल्ला अधिकारी रामकुमार महतो गैल टरटिहारमे जारी आदेश अनुसार डेवारीमे फेन निरन्तरता डेना बटैलै ।

No description available.

जनाअवजको टिप्पणीहरू