कैलारी गाउँपालिकासे माघमे ३ दिन बिदा

पहुरा समाचारदाता
हसुलिया, २७ पुस । कैलालीके कैलारी गाउँपालिका थारु समुदायके माघके अवसरमे तीन दिन बिदा डेना निर्णय करले बा ।

गाउँपालिका पुस २९ से माघ २ गतेसम बिदा डेना निर्णय करल गाउँपालिकाके अध्यक्ष लाजुराम चौधरी जानकारी डेलैं । माघ थारु समुदायके सबसे भारी टिहुवार हो ।

अस्टेक, उ गाउँपालिकाके हिउँदे अधिवेशन फेन आजसे सुरु हुइल बा । गाउँपालिकाके अध्यक्ष लाजुराम चौधरी अधिवेशन उद्घाटन करल गाउँपालिकाके प्रवक्ता कमलप्रसाद चौधरी जानकारी डेलैं ।

हिउँदे अधिवेशन उद्घाटनमे उपाध्यक्ष लक्ष्मी सत्गौंवा, गाउँसभाके सदस्यहुक्रे, गाउँपालिकाके प्रमुख प्रशासकीय अधिकृत खगेन्द्रराज जोशीसहित कर्मचारीके उपस्थिति रहे । गाउँसभाके औरे बैठक माघ १६ गते बोलाइल बा ।