कोरोनासे माघ मेला प्रभावित

पहुरा समाचारदाता
धनगढी, २८ पुस । माघक अवसरमे बिगतमे जिल्लाके टमान ठाउँमे माघी मेला लग्ना करे । मने इ बरस कोरोना भाइरस (कोभिड १९) के कारण माघ मेला तथा महोत्सव प्रभावित बने पुगल हो । कैलालीके कैलारी गाउँपालिका–६ बेनौलीस्थित अपरम्पार तपस्वी बाबा मन्दिर परिसरमे लग्ना माघी मेला कोरोनाके कारण इ साल नाइ लग्ना जनाइल बा ।

४६ बरससे लग्टी आइल मेला कोरोनासे इ साल प्रभावित बने पुगल मेला आयोजकहुक्रे बटैले बाटै । जिल्लास्थित टमान धार्मिक तिर्थस्थलमध्येके एक प्रमुख तिर्थ स्थल मानजिना अपम्पार तपस्वी बाबा मन्दिर परिसरमे माघ १ गतेसे ६ गतेसम माघी मेला लग्ना करल रहे ।

उ मन्दिरके धार्मिक महत्व ओ ऐतिहासिक पक्ष फेन बहुट बल्गर मानजाइठ । जौनकारण यी मन्दिर धार्मिक आस्थाके केन्द्रविन्दु फेन बन्न सफल हुइल स्थानीयहुकनके कहाई बा ।

स्थानीयहुकनके अनुसार मन्दिरमे माघ लहानके दिन नेपाली ओ भारतीय दर्शनार्थीहुकनके ढिउर जमघट रहटी आइल बा । बेनौलीके स्थानीय बुद्धिजीवी रामकुमार महतो बि.स. २०२९ सालमे मन्दिरके स्थापना हुइल जानकारी डेलै ।

उहाँ बि.स. २०१६ सालमे लालबोझिमे मलवारा करमदेऊ फलहारी पुजारीके दर्शन करे गैल बेला पुजारीसे हालके मन्दिर रहल स्थानमे एक जाने तपस्पी बाबा तपस्या करटी–करटी अलोक हुइल अनुसार उ स्थानमे जाके दर्शन करलपाछे अप्नेहुक्रे मन्दिरके स्थापना करल बटैलै । हाल फेन मन्दिरके एक पश्चिम साइडमे उ तपस्वीके गारल चिम्टा रहल बा ।

आजसे करिब ६२ बरष आघे फकिर सिंह थारू वनुवामे काठी करे गैल बेला कुह्रारसे काठीहे काटेबर कुह्रार भुठ हुइल बेला ढुंगा खोजेबर शिवलिंग पाइल फेन स्थानीयहुकनके दाबी बा । उ ढुंगा मानके उखारेबेर उखारे नैसेकलपाछे फकिर सिंह थारू गाउँक मनैन बलाके नानेबर शिबलिंग हेराइल कारण फेन स्थानीयहुक्रे उ मन्दिर शक्तिशाली रहल जनागिल बा ।

इहेबीच जिल्लाके दर्जनौं ठाउँमे माघी मिलन, मेला, महोत्सवके आयोजना हुइटी आइलमे इ साल सक्कु कार्यक्रम प्रभावित बने पुगल हो । कोरोनाके बावजुद फेन घोडाघोडी नगरपालिकाके बुट्का बाबा मन्दिर किर्र्तिपुरमे मेला आयोजना हुइना जनाइल बा ।

कलेसे कैलारीके हसुलियामे हुइटी आइल माघ महोत्सव, घोडाघोडीके नक्फोरुवास्थिति अस्ना बाबा मन्दिर परिसरमे लग्ना माघी मेला, बर्दगोरिया गाउँपालिकाके बर्दगोरिया, घोडाघोडी मन्दिर, बेहडाबाबा मन्दिर, जोशीपुर गाउँपालिकाके जोशीपुर, धनगढी उपमहानगरपालिका–१९ फूलवारीमे आयोजना हुइना मेला तथा महोत्सव इ साल नाइ लग्ना हुइल आयोजकहुक्रे जनैले बाटै ।