रास्वपा कैलाली जिल्ला अधिवेशनके निर्वाचन प्रक्रिया ओ परिणाम बदर
पहुरा समाचारदाता
धनगढी, ३१ जेठ । राष्ट्रिय स्वतन्त्र पार्टी (रास्वपा) के केन्द्रीय निर्वाचन आयोगसे कैलाली जिल्ला अधिवेशनके सक्कु निर्वाचन प्रक्रिया ओ उहीसे घोषित परिणामहे बदर कैना निर्णय करले बा ।
आयोगके अँटवार बैठल बैठकसे उ अधिवेशनके क्रममे हुइल प्रक्रिया विधान ओ कार्यविधि विपरीत हुइल ठहर करटी खारेज कैना निर्णय करल बा । आयोगके अनुसार जिल्लाके उम्मेदवार ओ सदस्यसे डेहल प्रमाण उजुरीके आधारमे अध्ययन करेबेर निर्वाचनमे गम्भीर त्रुटि भेटल बटाइल बा । आयोगसे निर्वाचन बदर कैनाके मुख्य चार ठो आधार सार्वजनिक करल बा ।
जिल्ला अधिवेशनके क्रममे हुइल कार्य गैर प्रक्रियागत ओ विधान विपरीत हुइल ओरसे निर्वाचनके निष्पक्षता ओ वैधता खण्डित हुइल निष्कर्ष निकारल बा । कैलालीमे नयाँ प्रक्रियामार्फत फेरसे अधिवेशन हुइना ओ नैहुइना कनाबारे थप जानकारी देहल नै हो । मने निर्वाचन प्रक्रिया बदर हुइनामे आयोगसे चार ठो तथ्य आगे सारले बा । प्रक्रियागत त्रुटिः प्राप्त तथ्य ओ उजुरीके आधारमे निर्वाचनके न्यूनतम आधारभूत प्रक्रियासमेत पालना नै हुइल पाइल ।
कार्यविधिके उल्लंघनः मतदान ओ मतगणनाके लग तय करल स्थापित नियम ओ निर्वाचन कार्यविधिके ठाडो उल्लंघन हुइल ।सर्वस्वीकार्यताके अभावः टमान पदके अधिकांश मुख्य उम्मेदवारसे निर्वाचन प्रक्रियाप्रति लिखित असहमति जनैटी प्रक्रिया बहिष्कार करल । समावेशी प्रतिनिधित्वमे अवरोधः स्थापित नामावली बमोजिमके योग्य सदस्य ओ प्रतिनिधिके सहभागिता सुनिश्चित नै करल । अधिवेशनसे निर्वाचित कार्य समिति भङग हुइलपाछे आन्तरिक विवाद चरकल ।
निर्वाचित कार्य समितिके पदाधिकारीसे चुनावी प्रतिस्पर्धामे सभापतिके दाबेदार रहल महेश चौधरी ओ हरि रेग्मीके दबाबमे निर्वाचन प्रक्रिया बदर करल आरोप लगाइले बाटै । ‘पाँच ठो निर्वाचन क्षेत्र ओ १३ ठो पालिकाके सभापति बैठके करल निर्णयके आधारमे अधिवेशन सम्पन्न हुइल बा । मने अब्बे निर्वाचित समितिहे मान्यता नैदेना करके निर्वाचन आयोगसे पत्र आइल बा ।
इ बारे हम्रे कानुनी लराइ लरबी । सक्कु निर्वाचन क्षेत्र ओ पालिकाके पदाधिकारीसे संयुक्त रूपमे हस्ताक्षर करके पत्र पठैना तयारीमे हम्रे बटी, सचिव मदनराज जोशी कहलै । अधिवेशनसे कवीन्द्र ठकुल्लाके नेतृत्वमे १० सदस्यीय नयाँ कार्य समिति निर्वाचित हुइल रहे ।
