धनगढी उपमहानगरपालिकासे २ हजार महिलाके पाठेघर परीक्षण
२ सय ३३ महिलामे एचपिभी संक्रमण
पहुरा समाचारदाता
धनगढी, ३१ जेठ । धनगढी उपमहानगरपालिकासे सञ्चालन करल प्रजनन् स्वास्थ्यसम्बन्धी विशेष स्क्रिनिङ कार्यक्रमअन्तर्गत २ हजार ३२१ महिलाके पाठेघरके मुखके क्यान्सर (एचपिभी डिएनए) परीक्षण करल बा ।
परीक्षणके क्रममे २३३ जानेमे एचपिभी संक्रमण (पोजेटिभ) डेखल उपमहानगरपालिकासे जनाइल बा ।
उपमहानगरपालिकाके अनुसार २०८२ चैत २५ गतेसे २०८३ जेठ १० गतेसम नगरके २० ठो स्थानमे प्रजनन स्वास्थ्य शिविर सञ्चालन करल रहे । शिविरमार्फत पाठेघरके मुखके क्यान्सर, आङ खस्न, फिस्टुला तथा स्तन क्यान्सरके स्क्रिनिङ करल रहे ।
तथ्याङकअनुसार एचपिभी डिएनए परीक्षण करल मध्ये करिब १० प्रतिशत महिलामे संक्रमण पुष्टि हुइल बा । उमेर समूहअनुसार हेरेबेर ३० से ४४ वर्ष उमेर समूहके महिलामे संक्रमणके दर ढेर डेखल स्वास्थ्य शाखा प्रमुख योगेश अवस्थी बटैलै । यी समूहमे २२३ जाने पोजेटिभ भेटल बटै कलेसे ४० वर्षसे उप्परके उमेर समूहमे १० जनहनमे संक्रमण डेखल बा ।
ओस्टेक करके, शिविरमे आङ खस्न समस्याके परीक्षण करलमध्ये ४० जनहनमे समस्या पहिचान हुइल रहे । उ मध्ये १० जनहनहे रिङ पेसरी प्रयोग करके उपचार करल उपमहानगरपालिकाके स्वास्थ्य शाखासे जनाइल बा ।
शिविरअन्तर्गत २ हजार २०८ महिलाके स्तन क्यान्सर तथा फिस्टुला सम्बन्धी परीक्षण कैना करल रहे । परीक्षणमे सहभागी सक्कु महिलाके नतिजा सामान्य रहल जनाइल बा ।
उपमहानगरपालिकासे एचपिभी पोजेटिभ नतिजा अइना कहल पाठेघरके मुखके क्यान्सर हुइटी रहल कना अर्थ नैलग्ना स्पष्ट पारल बा । एचपिभी संक्रमण क्यान्सरके जोखिमसँग सम्बन्धित संकेत हुइलेसेफेफे समयमे थप परीक्षण, परामर्श ओ आवश्यक उपचारसे जोखिम न्यूनीकरण करे सेक्ना स्वास्थ्यकर्मीहुकनके कहाई बा ।
उपमहानगरपालिकासे महिलाहुकनहे नियमित स्वास्थ्य परीक्षणमे सहभागी हुइना ओ प्रजनन स्वास्थ्यसम्बन्धी समस्याबारे सचेत रना आग्रह करले बा ।
