ज्येष्ठ नागरिकहे काठी वितरण
पहुरा समाचारदाता
टीकापुर, २९ पुस । कैलालीमे शीतलहर बह्रे लागलपाछे टीकापुर–७ स्थित सत्ती कर्णाली सामुदायिक वनसे ज्येष्ठ नागरिकहे निःशुल्क काठी वितरणके शुरुआत करले बा ।
सामुदायिक वन समितिसे सोम्मारके ७५ बरसे उप्परके ११२ घरपरिवारके ज्येष्ठ नागरिकहे काठी वितरण करे लागल हो । प्रतिव्यक्ति दुई क्वीन्टलके दरसे काठी उपलब्ध करैना जनाइल बा ।
शीतलमे ज्येष्ठ नागरिकहे सहज होए कहिके काठी वितरण करल वनके अध्यक्ष धनसिंह साउद बटैलै । ‘७५ बरससे उप्परके ज्येष्ठ सदस्यहुक्रनके सम्मान फेन हुइना ओ जारसे बचैना घरपरिवारहे फेन सजिल हुइना हुइल ओरसे निशुल्क काठी वितरण कैटी बाटी,’ उहाँ कहलै, ‘आघेक बरस चोकचोकमे काठी वितरण करले रही ओ इ बरस फेन चोकचोकमे काठी उपलब्ध करैटी बाटी । साथे ज्येष्ठ नागरिकके घरमे काठी पुगाइल लागल बाटी ।’
काठी घरमे पाइलपाछे ज्येष्ठ नागरिक खुशी हुइल बाटै । ज्येष्ठ नागरिक गम्भीर सिंह सामुदायिक वनसे समस्या बुझल बटैलै । ‘जार बह्र्रल बा । इ समयमे वनसे घरमे काठी लानडेहल,’ उहाँ कहलै, ‘आब आगी तापके बैठे पैना हुइल ।’ एक हजार ४०० उपभोक्ता रहल उ सामुदायिक वनसे टमान सामाजिक कार्य करटी आइल बा ।
