घोडीघोडा लघुवित्तके पाँचौ साधारण सभा

पहुरा समाचारदाता
धनगढी, २९ पुस । घोडीघोडा लघुवित्त वित्तीय संस्था लिमिटेडके पाँचौ साधारण सभा हुइल बा ।
संस्थाके अध्यक्ष प्रभातकुमार चौधरीके अध्यक्षतामे हुइल कार्यक्रममे उहाँ शेयर धनीहुकन लाभांश वितरण करे नइसेक्लेसेफे मजा फडको मारल बटैलै । संस्थाके अब्बे २ करोड ७६ लाख २५ हजार शेयर पूँजी रहल ओरसे खासे प्रगति करे नइसेकल ओ नियमकारी निकाय नेपाल राष्ट्र बैंकके निर्देशन अन्सार यूनिक नेपालसंग मर्जर हुइ लागल बटैलै ।

सस्थाके प्रमुख कार्यकारी अधिकृत कुन्नुनारायण चौधरी सोचल जटरा प्रगति नइहुइलेसेफे अवस्था सुधारोन्मुख रहल बटैलै । असार मसान्तसम ९८ करोड १ लाख १६ हजार कर्जा लगानी करल उहाँ बटैलै । घोडीघोडा लघुवित्त वित्तीय संस्थाके सदस्यसे बचत रु ३ करोड ७६ लाख ५८ हजार, टमान बैंक तथा वित्तिय संस्थासे कर्जा सापटी रु ३१ करोड २६ लाख ३४ हजार रहल उहाँ जनैलै । घोडीघोडाके अब्बेसम बेलौरी, गेटा, जोशीपुर, हसुलिया, पहलमानपुर, कृष्णपुर, दैजी, भजनी ओ चौमालामे शाख विस्तार करल उहाँ जनेलै ।

संस्थाके संचालक तथा मर्जर समितिके संयोजक पुरन प्रसाद चौधरी नियमनकारी निकाय नेपाल राष्ट्र बैंकके निर्देशन अन्सार घोडीघोडा लघुवित्त वित्तीय संस्था लिमिटेड यूनिक नेपालसे मर्जर हुइ लागल बटैलै ।

संस्थाके संचालक नेत्रबहादुर चन्द शेयर पुँजी कम रहल कारण संस्था लक्ष्य अन्सार प्रगति करे नइसेकल बटैलै । उहाँ कहलै, ‘मजा प्रगति हुइक लाग करिब ५ करोड शेयर पुँजी हुई पर्ना जरुरी बा, घोडीघोडा लघुवित्त वित्तीय संस्था लिमिटेड यूनिक नेपालसे मर्जरके प्रक्रिया बढाइल ओरसे मजा हुई ।’

संस्थापक शेयर रोशन चौधरी लघुवित्त यहाँसम पुग्ना भारी बाट रहल बटैलै । उहाँ कहलै, यी फे एक ठो व्यावसाय हो, कौनोफे व्यवसाय फस्टाइक लाग समय लागे सेकठ, सक्कु शेयर सदस्य धैर्य रहे परल ।’ मर्जर सक्कुहुनके सहमति अन्सार ओ नियमनकारी निकायके निर्देशन हुइटी रहल ओरसे लगानी सुरक्षित रहना उहाँ बटैलै ।

सस्थाके संचालक बुधराम चौधरी यी बरससे शेयर धनीहुकन लाभांश बँटना लक्ष्य लेहल मने कोरोनाके कारण नानल कार्यक्रम प्रभावित हुइल बटैलै । उहाँ कहलै, अब्बे प्रतिस्पर्धाके समय बा, छोट पुँजी बा, मजा करे खोजगिल मने अब्बेक परिस्थितिसे प्रभाव परले बा ।’

घोडीघोडा लघुवित्त वित्तीय संस्था लिमिटेडके पाँचौ साधारण सभा कार्यक्रममे संचालक पिङगला थारु, पूर्व संचालक सरोज चौधरी, बुन्दीलाल चौधरी, नेपाल खानेपानी सस्थानके केन्द्रीय अध्यक्ष जीवलाल चौधरी, नमस्ते बचत तथा ऋण सहकारी संस्था लिमिटेडके अध्यक्ष जगतराम चौधरी, सस्थाके संस्थापक शेयर सदस्य, टमान समुहके सदस्य, कर्मचारी लगायतके उपस्थिति रहल बा ।