आयोडिन नून सम्बन्धी सचेतना कार्यक्रम
पहुरा समाचारदाता
अछाम, ९ फागुन । चौैरपाटी गाउँपालिकाके आयोजना ओ साल्ट ट्रेडिङके प्राविधिक सहयोगमे अछामके चौरपाटीमे आयोडिन नून सम्बन्धी सचेतना कार्यक्रम हुइल बा ।
कार्यक्रममे बोल्टी राष्ट्रिय सभा सदस्य शेरबहादुर कुवँर आयोडिनके कमीसे टमान समस्या विल्गाइल ओरसे आयोडिनयुक्त नूनके प्रयोग करे पर्नामे स्थानीय बासीहे जोड डेलै । उहाँ नेपाल जैसिन समुद्रसे दुर रहल देश रहलमे आयोडिनके कमीसे मनैनमे टमान रोग विल्गाई लागल ओरसे शरिरके लाग नइहुके पोशक तत्व आयोडिन नुन प्रयोग करे पर्ना बटैलै ।
कार्यक्रममे राट्रिय योजना आयोगके पुर्व सदस्य बिजय कुवँर, नेपाल कम्युनिष्ट पार्टीके सचिवालय सदस्य रामबहादुर थापा, नेपाली कांग्रेसके गाउँ कार्यसमिति सभापति गणेश शाह, नेपाल पत्रकार महासंघ कैलालीके पुर्व अध्यक्ष भरत शाह, नेपाल पत्रकार महासंघ अछामके अधयक्ष खम्म खत्री,शिक्षक महासंघ अछामके सभापति दिनेश कुवँर लगायत आयोडिन नुनके बारेमे बोलल रहिट ।
कार्यक्रममे साल्ट ट्रेडिङ कर्पोरेशन लिमिटेड धनगढीके नायब महाप्रबनधक केशव प्रसाद पाण्डे आयोडिन नूनके प्रयोग, महत्व बारेमे बटैले रहिट । साथे उहाँ आयोडिन नून प्रयोग करेबेर हुइना फाइदार बेफाइदाके बारेमे समेत बटैले रहिट ।
चौरपाटी गाँउपालिकासे एक वर्ष अघि ढिके नूनमे प्रतिबन्ध लगाके आयोडिन युक्त प्याकेटके नुन केल प्रयोमे नानल रहे । गाउँपालिका अध्यक्ष हर्क साउँदके अध्यक्षतामे हुइल कार्यक्रममे उपाध्यक्ष माया कुवँर स्वागत मन्तव्य व्यक्त करल रहिट कलेसे कार्यकारी अधिकृत धनबहादुर थापा कार्यक्रम संचालन करल रहिट ।
कार्यक्रममे गाउँपालिका राजनितीक दलके प्रतिनिधी, विद्यालय व्यवस्थापन समितिके अध्यक्ष तथा प्रधानाध्यापक, महलिा स्वयम सेविका, विद्यार्थी, पत्रकार स्थानीयके सहभागीता रहल रहे । गाउँपालिकासे जनतासंग प्रत्यक्ष जोरल हरेक विषयमे अग्रसर हुके कार्य करटी आइल बा ।
