लावा डग्गर मनाइल १२औं बरसगाँठ: सोम, सिताराम, दोषहरण ओ बसन्ती पुरस्कृट

पहुरा समाचारदाता
देउखर, १० फागुन । थारु भासाके लावा डग्गर त्रैमासिकके १२औं बरसगाँठके अवसरमे सनिच्चरके चार जाने थारु स्रष्टा पुरस्कृट हुइल बटाँ ।

पुरस्कृट हुउयइनमे जंग्रार साहित्यिक बखेरी, बर्दियाके अध्यक्ष सोम डेमनडौरा, थारु लेखक संघ नेपालके अध्यक्ष सिताराम चौधरी, गायिका बसन्ती चौधरी ओ गायक दोषहरण चौधरी बटाँ । ओस्टक लोकगायिका निर्मला चौधरी सम्मानिट हुइल बटि ।

लावा डग्गर त्रैमासिकके प्रधान सम्पादक छविलाल कोपिला कार्यक्रमके घरगोस्याके रुपमे सक्हुन स्वागत कैटि गइल बरस बरसगाँठ मनाइ नैसेकगैल ओर्से असौं ढेरजनहन पुरस्कृट करल जनैलाँ । पुरस्कारके रकम जनही ५ हजार रुप्या बा ।

पुरस्कार कोष स्थापना करुइयनके ओर्से डा. कृष्णराज सर्वहारी कहलाँ, ‘थारु साहित्यमे स्रस्टालोगनके बेक्टिगट जाँगर टे पर्लि बा । जंग्रार साहित्यिक बखेरी ओ थारु लेखक संघ मार्फट क्रमस सोम डेमनडौरा ओ सिताराम चौधरी अग्वाइ कैके आउर जनहन थारु साहित्य लिख्ना उट्प्रेरना डेलकमे फेन पुरस्कार डे गइल ।’

लावा डग्गर पत्रिका देउखरसे प्रकासिट हुइना ओर्से पुरस्कारके लग देउखर क्षेत्रके स्रस्टन फेन सम्झेबेर गिटसंगिट मार्फट टेवा डेहल गायिका बसन्ती चौधरी ओ गायक दोषहरण चौधरीहे पुरस्कृट कैगैल उहाँक् कहाइ रहे । दोषहरण चौधरी भर कार्यक्रममे उपस्ठिट नै रहिट ।

कार्यक्रममे स्रस्टा सुशील चौधरी, शेखर दहित, निमबहादुर थापा, जनगायक नारायण योगी, जनकवि बमबहादुर थारु, थारु कल्याणकारिणी सभा (थाकस)के दाङ अध्यक्ष भुवन चौधरी, थाकस देउखर सचिव बालगोविन्द चौधरी, अधिबक्ता सुभराज चौधरी, राप्ती साहित्य परिषदके अध्यक्ष पुरुषोत्तम खनाल लगायट पहुनन् पुरस्कृटहुकन बधाइ डेले रहिट ।

रामप्रकाश चौधरी सहजिकरन करल कार्यक्रममे पुरस्कट हुउइयन सक्कु जाने पुरस्कार सम्मानले काम कर्ना आउर जाँगर बह्रल बटैले रहिट । ओस्टक बसन्ती चौधरी ओ निर्मला चौधरी गिट गाके कार्यक्रम चम्पन बनैले रहिट ।

डोसर समाचार अनुसार लेखक संघ दाङमार्फट डा. कृष्णराज सर्वहारी अपन बुडु बुडिके नाउँमे स्ठापना करल निबुलाल–डोङली थारु साहित्य पुरस्कारसे इ बरस लोकगायिका गोमादेवी चौधरी पुरस्कृट हुइल बटि । गोमादेवी लगायट आउर स्रस्टन नेपाल पत्रकार महासंघ, घोराहीके हलमे सुखके रोज एक कार्यक्रम आयोजना कैके पुरस्कार डे गइल रहे ।