रेशमहे जेलमे रख्ले रना तागत आब केक्रोठन नैहो : महतो

पहुरा समाचारदाता
धनगढी, १८ फागनु । जनता समाजवादी पार्टीके वरिष्ठ नेता राजेन्द्र महतो रेशम चौधरीहे जेलमे रख्ले रना तागत आब केक्रोठन नै रहल बटैले बाटै ।

धनगढीमे मंगरके आयोजित पत्रकार सम्मेलनमे महतो उहाँहे रिहाई नैकैलेसे ‘जेल भराउ’ आन्दोलन सुरु कैना बटैटी जेलमे रख्ले रना तागत आब केक्रोठन नैरहल बटाइल हुइट । महतो कहलै, ‘रेशमहे आब जेलमे रख्ले रहना तागत केक्रोठन नैहो । रिहाई नैकैलेसे जेल भराउ आन्दोलन सुरु हुइ, हम्रहीन सक्कु जनहनहे जेलमे रख्ना क्षमता टे राज्यसंग फेन नैहो ।’

संविधान लेखनके क्रममे २०७२ भदौ ७ गते कैलालीके टीकापुरमे थरुहट आन्दोलनकारी ओ प्रहरीबीच दोहोरो झडप हुँदा ८ प्रहरीसहित १ नाबालकके ज्यान गैल रहे । ओकर डोसर सकारे कफ्र्यु जारी हुइल समयमे ८० से ढिउर थारु समुदायके घर, पसल, एफएम लगायतमे आजजनी हुइल रहे । उ घटनाके मुद्दामे सांसद रेशम चौधरीसहित नेता कार्यकर्ता जेल सजाय भोग्टी रहल बाटै ।

इहीसे आघे जिल्ला अदालत कैलालीके फैसालासे कुछ सजाय पाके जेल मुक्त हुइल मोर्चाके केन्द्रीय संयोजक समेत रहल लक्ष्मण थारु उच्च अदालत दिपायलके जन्मकैदके फैसालापाछे उहाँ अर्धभूमिगत रहल बाटै ।

ओहेक्रममे नेता महतो अपनहुक्रे तत्काल सरकारमे नै जैना बटैले बाटै । सत्तारुढ नेपाल कम्युनिस्ट पार्टी (नेकपा)को करिब दुईतिहाइ बहुमतमा बनल सरकारमे जैनाके औचित्य नै रहल उहाँ तर्क करलै ।

‘अब्बेसम कम्युनिस्ट पार्टीके करिब दुईतिहाइके सरकार बा । अइसीन बेला हम्रे सकारमे जाके कौनो अर्थ नैहो’उहाँ कहलै, ‘अब्बे कांग्रेस फेन सरकारमे सहभागी नैहुइ, नैहुइ परल ।’

उहाँ तत्काल नेकपाके डुनु पक्षसे सहकार्य नैहुइना समेत स्पष्ट परले बाटै । महतो प्रधानमन्त्री केपी ओलीउपर अविश्वासके प्रस्ताव लन्ना विषयमे फेन छलफल नैहुइल बटैलै ।

‘हमार बीच अविश्वासके प्रस्तावबारे अब्बेसम कुछ छलफल नैहुइल हो’, उहाँ कहलै, ‘अविश्वासके प्रस्ताव कोइ लानी कलेसे उ बेला छलफल हुइ ।’