प्रदेश सभा बैठक डुसराचो स्थगित

पहुरा समाचारदाता
धनगढी, २० फागुन । सुदूरपश्चिम प्रदेशके सातौं अधिवेशनके बुधके आह्वान करल बैठक स्थगित हुइल बा । प्रदेश सभामे सूचना टाँस करटी बैठक स्थगित हुइल जानकारी डेहल हो ।

उ सूचनामे विशेष कारणसे वैठक स्थगित करल उल्लेख बा । इहीसे आघे सोममारके आह्वान करल बैठक फेन सुरु नैहुइटी सूचना टाँस करल स्थगित करल रहे । प्रदेशके औरे बैठक आज (बिफेक रोज) दिनके १ बजे आह्वान करल बा ।

प्रदेश सभाके विषयगत समितिमे प्रदेश अनुसन्धान तथा प्रशिक्षण प्रतिष्ठान सम्बन्धमे व्यवस्था कैना बनल विधेयक दफाबार छलफल ओराके सभामे पेश करजैना कार्यक्रम रहल सभामुख अर्जुनबहादुर थापा बटैलै ।

उहाँ कहलै– ‘उ विधेयकहे विषयगत समितिसे अन्तिम रुप नैडेहलपाछे बैठक स्थगित करल हो ।’ उहाँ बिफेक रोज आह्वान करल बैठक जैसिक फेन सञ्चालन हुइना बटैलै । उहाँ कहलै– ‘विषयगत समितिसे ‘सुदूरपश्चिम प्रदेशके वीऊबिजन सम्बन्धमे व्यवस्था कैना बनल विधेयक’ ओ ‘सुदूरपश्चिम प्रदेशके दुग्ध विकास बोर्ड स्थापना ओ व्यवस्थापन कैना सम्बन्धमे व्यवस्था कैना बनल विधेयक’हे अन्तिम रुप डेसेकल बा । आज इ दुई विधेयकमध्ये एकठो टेवल हुइना बा ।’
सातौं अधिवेशनके पाँचौ बैठकसम आपुगटसम सभासे एक अध्यादेश ओ एक ऐन पारित होसेकल बा कलेसे विजनेश नैहोके दुईचो बैठक स्थगित करल बा ।

प्रदेशके सातौं अधिवेशन शुरु हुइठनले चौथो बैठकसे वातावरण संरक्षण सम्बन्धी कानुन संशोधन ओ एकीकरण कैना बनल अध्यादेश ओ पाँचौ बैठकसे सुदूरपश्चिम प्रदेश बालबालिका सम्बन्धी व्यवस्था कैना बनल विधेयक पारित हुइल बा । अब्बे प्रदेश सभाके विषयगत समितिमे चारठो विधेयक दफाबार छलफलमे रहल बावै ।