५६ जनाके एन्टीजेन परीक्षणके नतिजा पोजेटिभ
पहुरा समाचारदाता
कञ्चनपुर, २२ चैत । भारतसे अउइया बह्रलसंगे कोरोनाके संक्रमणसमेत बह्रटी रहल बा । सीमा नाका त्रिनगर (डोकेबजार) होके भारतसे अउइया व्यक्तिमे कोरोनके संक्रमण अधिक डेख परे लागल बा ।
शुक ओ शनिच्चरके सीमानाका होके आइल व्यक्तिके एन्टीजेन परीक्षण करेबर ५६ जनहनके परीक्षणके नजिता पोजेटिभ आइल बा । शनिच्चरके किल सीमानाका होके फर्कल ७६७ जनहनके एन्टीजेन परीक्षण करलमे जौन मध्ये ३२ जनहनके परीक्षणके नतिजा पोजेटिभ आइल सशस्त्र प्रहरी बल नेपाल नम्बर ३५ हेडक्वाटर शैलेश्वरीके सशस्त्र प्रहरी उपरीक्षक वीरेन्द्रबहादुर ऐर जानकारी डेलै ।
ओहकान अनुसार एन्टीजेन पोजेटिभ आइल सक्कु जनहनहे धनगढी उपमहानगरपालिकासे सञ्चालन करल आइसोलेशनमे राखल बा । एन्टीजेन परीक्षणमे १४ वर्षीय बालकसे ६० वर्षीय वृद्धसमके नतिजा पोजेटिभ आइल बा । एन्टीजेन पोजेटिभ आइलमे १५ जाने कैलाली, दुई जाने सुर्खेत, सात जाने अछाम, एक जाने कञ्चनपुर, तीन जाने डोटी, एक जाने जुम्ला, एक जाने बझाङ ओ दुई जाने डडेल्धुराके रहल बाटै ।
सिमानाकामे रहल हेल्थ डेस्कमे भारतसे अउइयाके एन्टीजेन परीक्षणके व्यवस्था करल बा । भारतसे अउइयाके संख्या ढिउर रलेसे फेन हेल्थ डेस्कमे भर स्वास्थ्यकर्मीके संख्या कम होके परीक्षणमे समस्या हुइटी आइल बा ।
सीमानाका त्रिनगर र गड्डाचौकी होके भारतसे अउइया तीन जनहनके लावा प्रकारके (भेरियन्ट) कोरोनाके सङ्क्रमणसमेत डेखल रहे । तीनु जाने अब्बे आइसोलेशनम बैठल बाटै ।
भारतमे कोरोनाके सङ्क्रमण बह्रलसंगे मजदूरीके लाग गैल नेपाली घर आइ लागल बाटै । कुछ खेती लगाइल गहुँबाली भित्र्याइ ओ सुदूरपश्चिमके चाडपर्व चैते दशैँ मनाइक लाग समेत घर आइ लागल हुइट । सीमा क्षेत्रके आवतजावतमे खुकुलो करलपाछे निकटवर्ती भारतीय बजारमे किनमेल कैना समेत आवतजावतके कार्य हुइटी रहल कोरोनाके संक्रमणके खतरा बह्रल बा ।
