कर्णालीमे राष्ट्रिय थारु साहित्य सम्मेलन निम्जल
पहुरा समाचारदाता
वीरेन्द्रनगर, २३ चैत । कर्णाली प्रदेश सुर्खेतके वीरेन्द्रनगर नगरपालिका, नयाँ गाउँस्थित कर्णाली थारु होमस्टेमे पाँचौँ राष्ट्रिय थारु साहित्य सम्मेलन अँट्वारके रोज निम्जल बा ।
दुई दिनसम चलल उ सम्मेलनके उद्घाटन वीरेन्द्रनगर नगरपालिकाके नगरप्रमुख देवकुमार सुवेदी करले रहिट । कार्यक्रमके उद्घाटन करटी नगरप्रमुख सुवेदी थारु भाषा साहित्य समृद्ध रहल ओ संरक्षण करेक लाग अप्ने फेन लागल बटैलैं । उहाँ थारु समुदायहे आघे बह्राइक लाग सामाजिक, शैक्षिक, साँस्कृतिक तथा स्वास्थ्य ओ रोजगार लगायतके क्षेत्रमे आघे बह्रेपरनामे जोड डेलैं । ओस्टेक उहाँ आधुनिकता ग्रहण करनासे बरु अपन समृद्ध संस्कृतिके संरक्षण करेपरना सुझाब डेलैं ।
कार्यक्रममे नेपाल प्रज्ञा प्रतिष्ठानके मातृ भाषा साहित्य विभागके विभाग प्रमुख प्राज्ञ लक्ष्मी माली थारु समुदाय यी मेरिक साहित्य सम्मेलन करके थारु साहित्यके संरक्षण ओ प्रवद्र्धनमे महत्वपूर्ण योगदान पुग्ना बटैलैं । नेपाल प्रज्ञा प्रतिष्ठानसे हरेक वर्ष टमान सामुदायके मातृभाषा अन्तर्गतके पुरस्कार डेना करल ओरसे आगामी दिनमे थारु समुदाय फेन लेहे सेके कहिके शुभकामना व्यक्त करलैं ।
अस्टेक कार्यक्रममे मध्य पश्चिम विश्वविद्यालयके पूर्व रजिष्ट्रार एवं सुर्खेत शिक्षा क्याम्पसके उपप्रध्यापक डा. महेन्द्रकुमार मल्ल साहित्य समाजके सर्वोत्तम शक्ति रहल ओरसे साहित्यसे समाजके संस्कृतिके उजागर करना बटैलैं । यकर लाग स्वयम् थारु साहित्यके विकास समृद्धिके लाग यी सम्मेलन महत्वपूर्ण रहल बटैलैं । टमान जिल्लासे आइल थारु साहित्यकारके जमघटसे सुर्खेतहे एक ऊर्जाशील सन्देश डेहल बटैलैं ।
कार्यक्रममे वरिष्ठ साहित्यकार महेशविक्रम शाह ओ आख्यानकार नयनराज पाण्डे सम्मेलनमे आख्यानके ओज विषयमे प्यानलिष्ट विज्ञके रुपमे प्यानलिष्ट छलफल करके थारु साहित्यकार ओ गैरथारु साहित्यकारबीच अनुभव आदानप्रदानसे लेखकहुकनमे थप ऊर्जा प्राप्त हुइल सम्मेलनके संयोजक मानबहादुर पन्ना बटैलैं ।
उ अवसरमे थारु लेखक संघ थारु भाषा तथा साहित्यके क्षेत्रमे महत्वपूर्ण योगदान डेहल कटी कथाकार शेखर दहितहे पुरस्कृत करले बा कलेसे प्राज्ञ लक्ष्मी मालीहे सम्मान करले बा । अस्टेक, सुर्खेतमे थारु समुदायके क्षेत्रमे महत्त्वपूर्ण योगदान डेहल समाजसेवी मानवीर थारु, कृष्णबहादुर थारु, जागुराम थारु ओ सरिता चौधरीहे सम्मान करले बा । साथे, जंग्रार साहित्यिक बखेरीके १० औं वार्षिकोत्सवके अवसरमे आयोजना करल निबन्ध, कथा ओ कविता लेखनमे उत्कृष्ट हुइल स्रष्टाहुक्रे शेखर दहित ओ हिमलाल थारुहे समेत पुरस्कृत करले बा ।
कार्यक्रममे थारु आयोगके सदस्य भोलाराम चौधरी, सुबोधसिंह थारु, थारु संस्कृतविद् सुशील चौधरी, भगवति चौधरी, थारु कल्याणकारिणी सभा दाङके सभापति भुवन चौधरीलगायत मन्तव्य व्यक्ति करले रहिट ।
थारु लेखक संघ नेपालके अध्यक्ष डा. कृष्णराज सर्वहारी सम्मेलनमे थारु गीतके डगर । थारु पहिचानके सवालमे साहित्य, थारु मानक भाषा लेखनशैली आदिबारे बहस छलफल हुइल बटैलैं ।
कार्यक्रमके जंग्रार साहित्यिक बखेरी ओ थारु कल्याणकारिणी सभा, सुर्खेत सहआयोजक रहे कलेसे नेपाल प्रज्ञा प्रतिष्ठान, एआइपीपी ओ युनिक नेपाल सहकार्य करले रहे ।
कार्यक्रममे टमान जिल्लासे करिब २०० जाने लेखक, साहित्यकार तथा गायकहुकनके सहभागिता रहे ।
