रोकल ट्रकमे कार टकराके एकके मृत्यु
पहुरा समाचारदाता
धनगढी, २४ चैत । सोम्मार रात कैलालीके गोदावरी नगरपालिका अत्तरियामे रोकके राखल ट्रकमे कार टकराके एकजनहनके मृत्यु हुइल बा कलेसे औरे एकजाने गम्भीर घाहिल हुइल बाटै ।
गोदावरी नगरपालिका २ पहाडी रोडमे रहल खाने पानी ट्याँकी लग्गे रोकके राखल से १ ख १७३१ नम्बरके ट्रकमे बा १४ च ४६३४ नम्बरके कार टकराके कारमे सवार एक महिलाके मृत्यु हुइल प्रहरी जनैले बा ।
जिल्ला प्रहरी कार्यालय कैलालीके निमित्त प्रहरी प्रमुख प्रहरी नायब उपरीक्षक (डिएसपी) प्रतीक बिष्ट मृतक महिला सुर्खेत छिन्छुकी अन्दाजी २५/२६ बर्षिया सुनिता पुनमगर रहल बटैलै ।
धनगढी स्थित सेती प्रादेशिक अस्पतालमे उपचारके क्रममे पुन मगरके मृत्यु हुइल डिएसपी बिष्ट जानकारी डेलै ।
कारके चालक कञ्चनपुरके शुक्लाफाँटा नगरपालिका वडा नम्बर ५ वनसमितिके २८/३० वर्षिय नरेन्द्र कुँवर घाहिल हुइल बाटै । ओहकान धनगढी स्थित निसर्ग अस्पतालमाके आइसियुमे उपचार हुइटी रहल प्रहरी जनैले बा ।
