‘कला संस्कृति संरक्षण कैना सबके दायित्व’
पहुरा समाचारदाता
हसुलिया, २८ चैत । थारू कलाकारहुक्रे थारू समुदायके भाषा, कला संस्कृतिहे राष्ट्रिय तथा अन्तर्राष्ट्रिय स्तरमे चिनैना सहयोग करल कैलारी गाउँपालिकाके अध्यक्ष लाजुराम चौधरी बटैले बाटै ।
कैलारी गाउँपालिका–१, हसुलियामे शनिच्चरके हुइल सिएस वेष्ट म्युजिक भिडियो अवार्ड २०७६ समुद्घाटन कार्यक्रमहे सम्बोधन कैटी उहाँ थारू कलाकार आपन कलाकारितासे थारू भाषा, कला संस्कृतिहे राष्ट्रिय तथा अन्तर्राष्ट्रिय स्तरमे पुगैना सफल हुइल बटाइल हुइट ।
कार्यक्रमके बर्का पहुना समेत रहल अध्यक्ष चौधरी कलाकारहे समाजके ऐना समेत रहल बटाइल रहिट । साथे कलाकारहुक्रे नै लोप हुइटी गैल भाषा, कला संस्कृति संरक्षणमे मुख्य भुमिका खेलल् उहाँ बटैलै । यकर साथे अध्यक्ष चौधरी लोप हुइटी गैल भाषा, कला संस्कृति सरक्षणमे सबसे दायित्व हुइ पर्नामे जोड डेलै ।
‘थारू समुदायमे टमान मेरिक भाषा, कला संस्कृति रहल बा, मने उ दिन प्रति दिन लोप हुइटी गैल बा,’ उहाँ कहलै– ‘यकर संरक्षण सम्बद्र्धन कैना हमार सबके दायित्व हो ।’
अध्यक्ष चौधरी लोप हुइटी गैल भाषा, कला संस्कृति तथा थारू कलाकारहे गाउँपालिकासे सम्मान ओ सहयोग रहल बटैटी उहाँ अइना दिनमे फेन सहयोग कैना प्रतिवद्धता जनैलै ।
कार्यक्रममे गाउँपालिकाके उपाध्यक्ष लक्ष्मी सत्गौंवा कलाकारिता क्षेत्रमे लागल सक्कु कलाकारहे सम्मान ओ सहयोग करे पर्ना बटैली । उहाँ कलाकर नै पुरान पुरान गीत बाँस बचाके थारू समुदायके पहिचान बचाइल बटैली ।
जानकी गाउँपालिकाके उपाध्यक्ष उमा महतो कलाकार ओ खेलाडी राष्ट्रके गहना रहल बटैली । उहाँहुक्रनहे सहयोग तथा सम्मान कैना जिम्मेवारी फेन आपनहुक्रनक जिम्मेवारी रहल बटैली ।
नेपाली कांग्रेसके राजसमझ चौधरी पुरान कला संस्कृति तथा गीत बाँस बचैना अब्बेक युवा पुस्ता तथा कलाकारहुक्रनके मुख्य दायित्व रहल बटैलै । म्युजिक भिडियो अवार्ड कार्यक्रममे २०७६ सालमे प्रालिसे रिलिज हुइल थारु गित किल अवार्डमे समावेश करल प्रालिके सञ्चालक सतिश सिन्हा बटैलै ।
’बहुभाषा, बहुसंस्कृति हमार पहिचान, यकर संरक्षण कैना हमार साझा अभियान’ नारा रहित हुइल अवार्ड कार्यक्रममे वेष्ट मेलोडी, वेष्ट कल्चर, वेष्ट डान्सी· म्युजिक भिडियो सहित ३ विधामे अवार्ड करल बा । ओस्टके मोडेल, गायक र निर्देशक सहित १५ जनहनहे फेन अवार्ड करल बा ।
कार्यक्रममे कलाकार मोडल तथा गायक गायिकाहुक्रनहे मनोनयन पत्र फेन हस्तान्तरण करगिल रहे । गायक श्री निवास चौधरी, गायिका सुमन चौधरी, मोडल सुनिता दहित, ममता चौधरी, रामचरण चौधरी, अन्नु चौधरी, जनक चौधरी, सुनिता खड्का, मोडल रितु चौधरी, गायिका समीक्षा चौधरी, सानु कुश्मी, वेष्ट कल्चर निर्देशक सुधराम दहित मनोनयनपत्र हस्तान्तरण करल रहे ।
ओस्टक मोडल सुमित्रा चौधरी, पुजा चौधरी, मोडल सामु चौधरी, मनिषा रावल, गायक लखन चौधरी, कल्चरल गीत सोनु कुश्मी, गायिका सुमन चौधरी, गायिका श्रीदेवी चौधरीहे फेन मनोनयन पत्र हस्तान्तरण करगिल रहे ।
पुुरान अग्रज कलाकारहुक्रनहे सम्मान, नयाँ कलाकारहे हौसला, थारु भाषा संस्कृति संरक्षण प्रवद्र्धन, थारु फिल्म जगतहे गुणस्तर प्रदान कैना उद्देश्य सहित प्रालि स्थापना हुइल हो । कैलारी गाउँपालिकाके मुुख्य प्रबद्र्धक तथा आर.डी कम्प्लेक्स धनगढीके मुुख्य प्रायोजन रहल रहे ।
कार्यक्रममे स्वागत मन्तब्य कार्यक्रमके सहसंयोजक चन्द्र चौधरी (चाँद) करल रहिट । कलेसे कार्यक्रमके सञ्चालन गायक राजु (राज) चौधरी ओ गायिका सुनिता चौधरी (फकलपुरान बुडी) करल रही ।
