बैशाख ७ गतेसे कोरोनाके डुसरा डोज
काठमाडौं, ३१ चैत । पहिल चरणमे कोरोना खोप लगाइलहुक्रनहे सरकारसे आगामी वैशाखमे डुसरा डोज लगैना कार्यतालिका सार्वजनिक करले बा । स्वास्थ्य मन्त्रालयसे वैशाख ७ से ११ गतेसम लक्षित समूहहे कोरोना खोपके डुसरा डोज लगैना जनैले बा ।
माघ १४ से फागुन १० सम पहिल मात्रा लेहल स्वास्थ्यकर्मी, सरकारी कर्मचारी, सुरक्षाकर्मी, सरसफाइकर्मी, पत्रकार, कूटनीतिक नियोगके कर्मचारीलगायतहे वैशाख ७ से ११ सम डुसरा मात्रा लगैना सरकार जनैले बा । इ अभियान देशभर चल्ना बा । ओस्टके डुसरा चरणमे खोप लगाइल ६५ बरस उप्परके व्यक्तिहे भर जेठ १५ से डुसरा डोज डेना तयारी हुइटी रहल बा ।
सरकारसे पहिल चरणमे ४ लाख ३८ हजार ८ सय ७९ जाने भारतमे उत्पादित कोभिसिल्ड खोप लगाइल रहिट । आबके चरणमे कोभिसिल्डके पहिल डोज लेहलहे डुसरा डोज डेहे लागल हो ।
भारतमे कोरोनाके महामारी उच्च स्तरमे पुगलसंगे नेपालमे फेन संक्रमण बह्रना खतरा बह्रटी बेला खोप अभियान चल्ना लागल हो । अब्बे चीनसे अनुदानमे डेहल खोप फेन लगैना क्रम चल्टी रहल बा । भारतसे अग्रिम भुक्तानी डेहल खोप फेन आभिन आइ सेकल नैहो ।
