ठप १२ सय २७ जहनमे कोरोना पुष्टि
काठमाडौं, ६ वैशाख । पाछेक २४ घण्टामे नेपालमे १२ सय २७ जाने कोरोना संक्रमित ठपल बाटैं । स्वास्थ्य तथा जनसंख्या मन्त्रालयके अन्सार देशके टमान प्रयोगशालामे करल ७ हजार १ पीसीआर परीक्षणसे सोम्मारके रोज १२ सय २७ जाने संक्रमित फेला परल हुइट । ओस्टेक ५ सय ४७ एन्टिजेन परीक्षणसे ५४ जानेमे संक्रमण पुष्टि हुइल बा ।
२४ घण्टामे पीसीआर ओ एन्टिजेन विधिसे हुइल परीक्षणसे १२ सय ८१ जाने संक्रमित हुइल बाटैं । हालसम नेपालमे कोरोना संक्रमितके संख्या २ लाख ८५ हजार ९ सय पुगल बा ।
२४ घण्टामे २५५ जाने डिस्चार्ज हुइल बाटैं । यी सँगे कोरोनामुक्त हुइलके संख्या २ लाख ७५ हजार ५५५ पुगल बा । कोरोनासे ज्यान गुमइयाके संख्या ३ हजार ९१ पुगल बा । सक्रिय संक्रमित ७ हजार २ सय ५४ बाटै कलेसे क्वारेन्टाइनमे ८१ जाने रहल बाटैं ।
कोरोनासे स्टाफ नर्सके मृत्यु
भेरी अस्पतालमे उपचाररत स्टाफ नर्सके कोरोना संक्रमणसे मृत्यु हुइल बा । दाङके तुलसीपुर निवासी २० वर्षिया स्टाफ नर्सके सोम्मार बिहान मृत्यु हुइल अस्पताल जनैले बा ।
मृतक स्टाफ नर्स दाङके राप्ती स्वास्थ्य विज्ञान प्रतिष्ठानमे कार्यरत रहि । अस्पतालके मेडिकल सुपरिटेन्डेन्ट डा.प्रकाश थापा ६ दिनसे उपचार करैटीरहल स्टाफ नर्सके मृत्यु हुइल बटैलैं ।
‘दाङसे कोरोना संक्रमण हुके उपचारके लाग नेपालगन्ज नानल रहे,’ मेसु डा. थापा कलैं, ‘६ दिनसे उपचारमे हुहि मने बचाइ नैसेकगिल ।’
