प्रदेश राष्ट्रिय वन सम्बन्धी विधेयक सभामे प्रस्तुत
पहुरा समाचारदाता
धनगढी, ७ बैशाख । सुदूरपश्चिम प्रदेशके राष्ट्रिय वन सम्बन्धमे व्यवस्था करना बनल विधेयकके प्रतिवेदन प्रदेश सभामे पेश हुइल बा ।
प्रदेश सभाके अर्थ विकास तथा प्राकृतिक स्रोत समितिसे उ विधेयकके मस्यौदामे दफाबार छलफल करके प्रतिवेदन तयार करल रहे । समितिके सभापति हर्कबहादुर कुँवरसे उ विधेयक प्रदेश सभाके सातौं अधिवेशनके २० औं बैठकमे सोम्मार प्रतिवेदन पेश करले रहिट ।
सभामे प्रतिवेदन प्रस्तुत करटी समितिके सभापति कुँवरसे मस्यौदामे संशोधन करल दफा ओ कारणसहित उल्लेख करले रहिट ।
ओस्टेक, सोम्मारके बैठल बैठकमे सभामुख अर्जुनबहादुर थापा प्रदेश सभा सदस्य झपटबहादुर बोहराके पदमुक्त हुइल जानकारी सदनमे करैले रहैं । नेकपा माओवादी केन्द्रसे सुदूरपश्चिम प्रदेश सभा सदस्यमे विजयी झपटबहादुर बोहरा उ पदसे मुक्त हुइल जनागिल बा ।
बोहरा नेकपा माओवादी केन्द्र दल त्याग करल ओरसे उहाँक प्रदेश सभा सदस्य पद छिनल हो । बोहरा माओवादी केन्द्र दल त्याग करल ओरसे संविधानके धारा १८० तथा राजनीतिक दल सम्बन्धी ऐन ओ प्रदेश सभा नियमवाली २०७४ बमोजिम उहाँ प्रदेश सभा सदस्य पदमे नैरहल सभामुख थापा बैठकमे जानकारी करैलैं ।
तत्कालीन नेकपाभित्तर आन्तरिक विवाद चट्कटी गैल बेला अदालतसे नेकपा खारेज करके साविक नेकपा एमाले ओ नेकपा माओवादी केन्द्र ब्यु“त्याइलपाछे बोहरा एमालेमे प्रवेश हुइल रहैं ।
उहाँ गैल निर्वाचनमे अछाम जिल्लाके निर्वाचन क्षेत्र नम्बर १ के ख से प्रदेश सभा सदस्यमे विजयी हुइल रहैं ।
प्रदेश सभाके औरे बैठक मंगरके रोज (आज) आह्वान करल बा ।