थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २७ बैशाख २६४५, सोम्मार ]
[ वि.सं २७ बैशाख २०७८, सोमबार ]
[ 10 May 2021, Monday ]
.

कैलालीमे आशिंक निषेधाज्ञा

पहुरा | ८ बैशाख २०७८, बुधबार
  • 7
  •  
  •  
  •  
  •  
  •  
  •  
  •  
    7
    Shares
कैलालीमे आशिंक निषेधाज्ञा

पहुरा समाचारदाता
धनगढी, ८ बैशाख ।
कोरोना भाइरस संक्रमणके जोखिम बह्रटी गैलपाछे कैलालीमे स्थानीय प्रशासनसे आशिंक रुपमे निषेधाज्ञा जारी करले बा ।

प्रमुख जिल्ला अधिकारी खगेन्द्रप्रशाद रिजालके अध्यक्षतामे बैठल संकट व्यवस्थापन केन्द्रके बैठकसे टमान क्षेत्रमे रोक लगाइल हो ।

जिल्ला प्रशासन कार्यालय कैलालीके सूचना अधिकारी शिवराज जोशीके अनुसार जिल्लाके धनगढी उपमहानगरपालिकाके सक्कु विद्यालय बन्द रहना बावै कलेसे अन्य स्थानीय तहहे फेन १० दिनसम विद्यालय बन्द कैना आग्रह करल बा ।

सिनेमा हल, पार्टी प्यालेस, डान्स बार, दोहोरी, नाचघर, क्लव, हेल्थक्लव, जिमखाना, स्वीमिङ फुल, हाटबजार, फुटसल बन्द कैना आदेश डेहल सूचना अधिकारी जोशी बटैलै । ओहकान अनुसार सभा, सम्मेलन ओ जुलुस कैना बैशाख मसान्तसम रोक लगाइल बा । मठ, मन्दिर, गुम्बा, चर्च लगायतके धार्मिक स्थलमे जनस्वास्थ्यके मापदण्ड पूरा कैके नित्य पूजा, ध्यान ओ प्राथना किल करे पैना कहल बा ।

ओस्टके सरकारी कार्यालय, बैंक तथा वित्तीय सस्था, सहकारी लगायतके संघसस्था विद्युतीय माध्यमसे सञ्चालन कैना ओ सम्भव नैरलेसे जनस्वास्थ्यके मापदण्ड पूरा कैके सञ्चालन कैना निर्देशन डेहल बा । आदेशके अवज्ञा करलेसे संक्रामक रोग २०२० अनुसार कारवाही हुइना आदेशमे कहल बा ।

उहोर जिल्ला प्रशासन कार्यालय कञ्चनपुर फेन आंशिक रुपमे निषेधाज्ञा जारी करले बा । जिल्ला कोभिड १९ संकट व्यवस्थापन केन्द्रके बैठकसे टमान क्षेत्रमे रोक लगाइल हो ।

जिल्ला प्रशासन कार्यालय कञ्चनपुरके निमित्त प्रमुख जिल्ला अधिकारी अशोक कुमार भण्डारीके अनुसार भिमदत्त नगरपालिकाके सक्कु विद्यालय बन्द करल ओ औरे स्थानीय तहहे संक्रमणके अवस्था ख्याल कैके आवश्यक व्यवस्था कैना जनाइल बा ।

  • 7
    Shares

जनाअवजको टिप्पणीहरू