धानक बियाके मूल्य निर्धारण
पहुरा समाचारदाता
धनगढी, ८ बैशाख । कैलालीमे धानक बीयाके मूल्य निर्धारण करल बा । बर्खे धानखेती करक लाग किसानके लाग उन्नत तथा गुणस्तरीय धानके बीयाके मूल्य निर्धारण करल बा ।
इ बरस उन्नत जातके मोटा धानक बीया प्रतिकिलो ६० रुपैयाँ ओ मसिन ६५ रुपैयाँ कायम करल बीजवृद्धि कृषक सहकारी संस्था जानकी गाउँपालिका मुनुवाके प्रबन्धक गोविन्द रावत बटैले बाटै ।
‘किसानहे खेती करेबर मूल्यमे एकरूपता होए ओ ठग्वा पैनासे बचिट कहिके हम्रे इ बरस मूल्य निर्धारण करले बाटी,’ प्रबन्धक रावत कहलै, ‘मूल्य समयमे तोकलमे किसान बजारमे गुणस्तरहीन धानके बीउ खरिद नैकरे परी । गुणस्तरीय धानक बीया प्रयोग करलमे उत्पादन फेन ढिउर लेहे सेकजाइ ।’ राष्ट्रिय बीउ उत्पादक संघ कैलाली ओ कञ्चनपुरके गत चैत २१ गते बैठल बैठकसे डुनु जिल्लामे लागू हुइना मेरके धानक बीउके मूल्य निर्धारण करल हो ।
उत्पादन क्षेत्रमे लागल ओ क्रियाशील बीया उत्पादक सहकारीहे मान्य हुइना मेरके संघसे उन्नत बीयासंगे प्रमाणित मोटा धानके बीया प्रतिकिलो ६८ रुपैयाँ ओ मसिनो ७० रुपैयाँ निर्धारण करले बा । ओस्टके मूल बीया मोटा प्रतिकिलो ७० रुपैयाँ ओ मसिनो ७५ रुपैयाँ निर्धारण करल बा ।
अइसीक निर्धारण करल मूल्य सक्कु जनहनहे मान्य हुइना मेरके निर्धारण करल मूल्य कार्यान्वयन करटी रहल धनसिंहपुर सहकारी संस्थाके प्रबन्धक मुना घर्तीमगर बटैलै । ‘मूल्य निर्धारण होके एकरूपता किल नैहो, किसानहे सजिल फेन हुइठ् । किसान सहकारी तथा सहकारीसे वितरण करल स्थानसे खरिद करे पैठै,’ प्रबन्धक घर्तीमगर कहलै, ‘गुणस्तरीय तथा उन्नत बीयाके प्रयोगसे उत्पादन बह्रना हुइल ओरसे किसान उन्नत बीयाके प्रयोग करे लागल बाटै ।’
किसानसे प्रयोग कैना धानके बीयाके जात अक्के रलेसे फेन कृषक सहकारी ओ कम्पनीअनुसार फरक रहना हुइल ओरसे किसान ठगीमे नै परिट कहिके अइसीक मूल्य निर्धारण करल हो ।
